Ekzotıkalyq jáne qaýipti janýarlardy esepke qoıý qajet pe

ASTANA. QazAqparat – Elimizde ekzotıkalyq jáne qaýipti janýarlardy úı jaǵdaıynda ustaýǵa tyıym salynǵan. Bul týraly Orman sharýashylyǵy jáne janýarlar dúnıesi komıteti tóraǵasynyń orynbasary Andreı Kım aıtty, dep habarlaıdy QazAqparat tilshisi.

«Qaýipti janýarlarǵa tyıym salynǵan. Úı jaǵdaıynda ustaýǵa tyıym salynǵan janýarlardyń tizimi bar. Soǵan oraı olar tirkeýge jatpaıdy. Jalpy, olardy úıde múldem ustaýǵa bolmaıdy. Qalǵan janýarlar, máselen tasbaqa men alamandy tirkeý mindetti emes. Azamattardyń óz qalaýy boıynsha júzege asyrylady. Negizgi eki janýar bar. Olar – ıt pen mysyq. Olardy mindetti túrde esepke qoıý kerek», - dedi komıtet tóraǵasynyń orynbasary elordada ótken brıfıngte.

Aıta keteıik, «Janýarlarǵa jaýapkershilikpen qaraý týraly» QR Zańyna sáıkes, bıyl 1 qyrkúıekten bastap mysyqtar men ıtterge chıp taǵý jáne olardy arnaıy esepke qoıý mindetti bolady.

Qazaqstandyqtar úshin elektrondy júıege janýarlary týraly aqparatty engizý – tegin. Degenmen, chıp taǵý úshin mysyq pen ıt ıeleri óz qaltasynan aqsha tóleýi tıis. Ony óteýge múmkindigi joq áleýmettik osal toptaǵy azamattarǵa qyzmet túri tegin bolmaq.