EQYU sarapshysy QR Prezıdenti saılaýyna áıel kandıdattyń qatysýyna oń baǵa berdi
«Biz Qazaqstan Prezıdent saılaýyna úlken qyzyǵýshylyqpen baqylaý júrgizdik. Men bul rette táýelsiz Qazaqstan tarıhynda tuńǵysh ret áıeldiń saılaýǵa túsip, ishki básekelestik kezinde óziniń erler qataryndaǵy birshama áriptesterin basyp ozdy. Osy saılaýdyń ereksheligi de osy der edim. Qazaqstanda aldaǵy ýaqytta barlyq deńgeıdegi saıasatqa áıelderdiń ıntegratsııasy arta túser degen úmittemin. Qazaqstan Respýblıkasynyń Parlamentinde ǵana emes, EQYU-ǵa múshe aımaqtaǵy basqa da elderde osy tendentsııa arta túser dep senim bildirgim keledi. Saılaýǵa daıyndyq barysy jaqsy júrgizilgeni baıqalady», - dedi Margareta Kıener Nellen elordada ótken brıfıng barysynda.
Eske sala ketsek, búgin QR Ortalyq saılaý komıssııasy 2019 jyldyń 9 maýsymynda ótken kezekten tys prezıdenttik saılaýda kandıdattarǵa saılaýshylardyń qansha daýys bergendigin jarııa etken bolatyn.
«Qazaqstan Respýblıkasy boıynsha Jambyl Ahmetbekov 167 249 daýys nemese saılaýshylardyń 1,83 protsent daýysyn, Danııa Espaeva 478 153 daýys nemese saılaýshylardyń 5,2 protsent daýysyn, Ámirjan Qosanov 1 472 733 daýys nemese saılaýshylardyń 16,02 protsent daýysyn, Tóleýtaı Rahymbekov 294 271 daýys nemese 3,2 protsent daýysyn, Amangeldi Taspıhov 190 304 daýys nemese saılaýshylardyń 2,07 protsent daýysyn, Qasym-Jomart Toqaev 6 504 054 nemese saılaýshylardyń 70,76 protsent daýysyn, Sádi-Bek Túgel 84 348 daýys nemese saılaýshylardyń 0,92 protsent daýysyn jınady», - dedi QR OSK tóraǵasynyń orynbasary Konstantın Petrov.