EQYU mıssııasy Májilis saılaýyn baıqaý jumysyn bastady

ASTANA. QazAqparat - QR Syrtqy ister mınıstriniń orynbasary Roman Vasılenko EQYU Demokratııalyq ınstıtýttar jáne adam quqyqtary jónindegi bıýrosynyń (EQYU/DIAQB) Qazaqstandaǵy parlamenttik saılaýdy baıqaý jónindegi mıssııasynyń basshysy Oýen Merfıdi qabyldady. Bul týraly QazAqparat SІM silteme jasap habarlaıdy.

Mıssııa basshysynyń orynbasary D. Ioanný jáne saılaý jónindegi keńesshisi M. Barker-Tsıganıkova da qatysqan kezdesýde taraptar 2023 jylǵy 19 naýryzǵa belgilengen QR Parlamenti Májilisi men máslıhattary depýtattarynyń kezekten tys saılaýyna daıyndyq barysyn talqylady.

R. Vasılenko DIAQB-ǵa mıssııany jedel ornalastyrǵany úshin alǵys bildirip, qazaqstandyq taraptyń baıqaýshylardyń tolyq jáne tıimdi jumys isteýi úshin barlyq qajetti jaǵdaı jasaýǵa daıyn ekenin atap ótti jáne sondaı-aq saılaýdy baıqaý nátıjeleri boıynsha saılaýdyń naýqanyna obektıvti jáne beıtarap baǵa beretinine úmit bildirdi.

Sonymen qatar DIAQB mıssııasynyń basshysyna Ádiletti Qazaqstandy qurý maqsatynda Prezıdent Qasym-Jomart Toqaevtyń bastamasymen elimizdegi saıası jáne áleýmettik-ekonomıkalyq qaıta qurýlar, sondaı-aq 2023 jylǵy 1 qańtardan bastap qoldanysqa engizilgen elimizdiń saılaý zańnamasy men saılaý júıesine ózgerister týraly habardar etti.

O. Merfı saılaýdy baıqaý úderisinde qazaqstandyq bılik organdarymen syndarly ózara árekettestik jasaý nıetin qýattap, aǵymdaǵy jáne basqa da osyǵan uqsas mıssııalardyń negizgi maqsaty shaqyrýshy tarapqa saılaý júıesi men tájirıbesin odan ári jetildirý jónindegi kúsh-jigerine kómektesý ekenin atap ótti.

EQYU/DIAQB Qazaqstan Respýblıkasy Parlamenti Májilisi men máslıhattary depýtattarynyń kezekten tys saılaýyn baqylaý jónindegi mıssııasy baıqaýshylary 7 aqpanda jumysyn bastap ony 29 naýryzda aıaqtamaq.

Foto: gov.kz