EQYU Qazaqstannyń genderlik saıasattaǵy jetistigin joǵary baǵalaýda

ALMATY. QazAqparat - Qazaqstan genderlik saıasatta eleýli jetistikterge qol jetkizdi. Bul týraly Almatyda ótken «Áıelder saıasatta jáne ýaqytsha arnaıy sharalar» atty semınarda Eýropadaǵy qaýipsizdik jáne yntymaqtastyq uıymynyń Astanadaǵy ortalyǵy basshysynyń orynbasary Jannet Klettser málim etti.

«Áıelderdi sheshimderdi qabyldaý deńgeıine shyǵarý - óte mańyzdy strategııalyq basymdyq. Qazaqstan genderlik saıasatta eleýli jetistikterge qol jetkizgendigin moıyndaǵan durys», - dedi ol.

Qazaqstan úkimetinde áıelderdiń sany artyp kele jatqandyǵyna qaramastan, osy kórsetkishterdi ary qaraı jaqsartý úshin zańnamamen bekitilgen tetikter kerek.

«Kóptegen elderde óziniń modeli bar, ol óziniń jaǵdaıyna baılanysty sáıkestendiriledi. Múmkin ol áıelderge basqarý salasyna ornalasýǵa múmkindik beretin kvota arqyly bolýy yqtımal», - dep atap ótti J.Klettser.

Semınarǵa qatysýshylardyń atap ótkenderindeı, áıel-saıasatkerler jemqorlyqqa az barady, zańǵa qaıshy áreketterge jolamaýǵa tyrysady, sonymen qatar ozbyrlyqqa jáne áskerı qaqtyǵystarǵa qarsy bolyp keledi. Áıelderdiń úlesi bılik qurylymdarynda 30-40 paıyzǵa jetetin elderde qoǵam turaqty damıdy ári áleýmettik baǵytta úlken jetistikter baıqalatyn kórinedi.