EQYU elderi Qazaqstanǵa taǵy da zor senim artyp otyr – sarapshy
«EQYU Parlamenttik Assambleıasy – EQYU-nyń derbes ınstıtýty. Ol 1991 jyly Madrıd konferentsııasynda Parıj hartııasy qabyldanǵan soń quryldy jáne ol Vankýverden Vladıvostokqa deıingi EQYU keńistigindegi jańa demokratııalyq qozǵalys pen ózgeristi bildiredi. Bul shynynda da, EQYU-ǵa múshe elder parlamentshileriniń yntymaqtastyǵy jónindegi óte qurmetti jáne táýelsiz ınstıtýt», - dedi M. Jarbosynova QazAqparat tilshisine bergen suhbatynda.
Sarapshy EQYU Parlamenttik Assambleıasynyń tóraǵasy men orynbasarlary taǵy bir qaıta saılaný múmkindigimen úsh jylǵa saılanatynyn atap ótti.
«Árıne, Qazaqstannyń ekinshi ret osyndaı joǵary senimge ıe bolýy, osy laýazymǵa saılaný múmkindigi – Qazaqstannyń 1992 jylǵy qańtardan beri EQYU-ǵa qatysqan jyldary alǵan qyzmeti men ımıdjiniń nátıjesi. Kezinde Qasym-Jomart Toqaev ta EQYU Parlamenttik Assambleıasynyń vıtse-prezıdenti, vıtse-tóraǵasy bolyp saılanǵanyn bilesizder. Mine, EQYU-ǵa qatysýshy elder Qazaqstanǵa taǵy da zor senim bildirip otyr», - deıdi M. Jarbosynova.
Sarapshy Parlamenttik Assambleıanyń óziniń jyl saıynǵy sessııalarynda EQYU-ǵa múshe elderde zańnama máselesin talqylaıtynyn, usynymdyq sıpattaǵy jáne qazirgi ózekti máselelerdi sheshýge baǵyttalǵan qandaı da bir sheshimder men qararlardy qabyldaıtynyn aıtty.
«Máselen, ótken jyly pandemııaǵa baılanysty jáne halyqaralyq yntymaqtastyq aıasynda COVID-19 taralýynyń aldyn alý jáne onyń saldaryn sheshýge yqpal etý týraly kóptegen máseleler boldy. Demokratııalandyrý men zańnyń ústemdigi de adam quqyǵy máselelerimen kóp baılanysty. Jalpy, EQYU Parlamenttik Assambleıasynda úsh komıtet bar – saıası máseleler, ekonomıkalyq máseleler jáne demokratııalandyrý men adamı ólshem máseleleri jónindegi komıtetter», - dep túsindirdi sarapshy.
Onyń aıtýynsha, máseleler eń aldymen osy komıtetterde talqylanady, sodan keıin jalpy sessııada qarar qabyldanady.
«Meniń oıymsha, A. Shákirovtyń tájirıbesin, kásibı bilimin, dıplomatııalyq jáne memlekettik qyzmet tájirıbesin eskere otyryp, osy laýazymǵa saılanýy Qazaqstannyń qazirgi joǵary ımıdjiniń kórsetkishi ǵana emes, Parlamenttik Assambleıanyń ózine de tıimdi bolady. Meniń oıymsha, ol parlamentaralyq yntymaqtastyq deńgeıinde órbıtin dıalogqa qajetti iskerlik notalar engize alady», - dep túıindedi M. Jarbosynova.