EQYU DIAQB-nyń saılaýǵa baǵasy tek usynym negizinde jarııalanyp otyr - SІM orynbasary
Ol Qazaqstannyń Syrtqy ister mınıstrligi Eýropa Qaýipsizdik jáne Yntymaqtastyq Uıymynyń elimizdegi saılaýǵa bergen baǵasyna qatysty tıisti ustanymy jarııalanǵanyn da eske saldy.
«EQYU aıasynda birqatar ınstıtýt jumys isteıdi. Sondaı ınstıtýttardyń biri – Demokratııalyq ınstıtýttar jáne adam quqyqtary jónindegi bıýro. Bul organ EQYU-ǵa múshe elderdiń barlyǵynda áli bekitilmegen belgili bir erejeler negizinde jumys isteıdi. Bul óz kezeginde saılaý naýqanyn baıqaý erejelerine qatysty», - dedi Roman Vasılenko Májiliste tilshiler suraǵyna jaýap bere otyryp.
Ol 2010 jyly DIAQB aıasynda №6 saılaýdy baıqaý boıynsha keıbir nusqaýlar derbes bekitilgenin atap ótti. Alaıda olar EQYU-ǵa múshe memleketterdiń ustanymdaryn esepke almaǵan.
«EQYU DIAQB uıymǵa múshe memleketterge demokratııalyq ınstıtýttardy damytýda kómek kórsetýi tıis. Bul óz kezeginde DIAQB saılaýdy baıqaýǵa nemese belgili bir organdarmen yntymaqtasýǵa shaqyrǵan EQYU-ǵa múshe memleketterge kómek kórsetýi kerek degendi bildiredi. Atap aıtqanda, bıylǵy maýsym aıynda DIAQB pen Qazaqstan Respýblıkasynyń Adam quqyqtary jónindegi ýákili arasynda yntymaqtastyq týraly memorandým jasaldy», - dedi R. Vasılenko.
Sonymen qatar ol DIAQB bergen baǵa EQYU-ǵa múshe memleketter qabyldaıtyn nemese qabyldamaýy múmkin usynymdar sanatyna jatatynyn jetkizdi.
«Osy jyldyń ózinde DIAQB Frantsııa, AQSh, Majarstan jáne Serbııadaǵy saılaýǵa baıqaýshy retinde qatysty. Bul turǵyda osy múshe memleketterge arnap usynystary bar baıandamalar jarııalandy. Ár múshe memleket DIAQB jarııalaǵan usynystarǵa qatysty óz baǵytyn derbes qarastyrady. Biz DIAQB-men odan ári yntymaqtastyqqa muqııat qaraıtyn bolamyz», - dedi mınıstrdiń orynbasary.