EQYU basshysy Qazaqstandaǵy saıası reformalardyń aýqymy zor ekenin atap ótti

NUR-SULTAN. QazAqparat - Parlament Májilisiniń Tóraǵasy Erlan Qoshanovpen kezdesýinde Eýropadaǵy qaýipsizdik jáne yntymaqtastyq uıymynyń qazirgi tóraǵasy, Polsha Respýblıkasynyń Syrtqy ister mınıstri Zbıgnev Raý Qazaqstandaǵy saıası reformalardyń aýqymy zor ekenin málimdedi, dep habarlaıdy QazAqparat.

Z.Raý Qazaqstan Prezıdenti Qasym-Jomart Toqaevtyń Konstıtýtsııalyq reformalaryn iske asyrý nátıjesinde Parlamenttiń róli kúsheıetinin atap ótti.

– Qazaqstandy aýqymdy saıası reformalardy júzege asyrýda bizdiń Uıym men EQYU Baǵdarlamalar ofısiniń barlyq resýrsy pen tájirıbesin tolyq paıdalanýǵa shaqyrǵymyz keledi, – dedi EQYU tóraǵasy.

Zbıgnev Raý Qazaqstanǵa EQYU-nyń qaıta saılanǵan tóraǵasy retinde óńirmen tanysýǵa arnalǵan sapary aıasynda arnaıy keldi. Sonymen qatar onyń Ózbekstan men Monǵolııaǵa da sapary josparlanýda.

Erlan Qoshanov EQYU tóraǵasynyń sapary Qazaqstan úshin mańyzdy saıası oqıǵa – referendým qarsańynda ótip jatqanyn atap ótti. Májilis Spıkeri muny Memleket basshysynyń reformalary men jalpyhalyqtyq referendýmdy qoldaýynyń dáleli dep sanaıdy.

Kezdesý barysynda taraptar Qazaqstan men EQYU-nyń ózara is-áreketiniń, Qazaqstan-Polsha ekijaqty qatynastarynyń, sonyń ishinde eki el parlamentteri arasyndaǵy baılanystyń qazirgi jaǵdaıy men keleshegin talqylady.

Z.Raý ótken ǵasyrdyń 30 jyldaryndaǵy saıası qýǵyn-súrgin kezinde Qazaqstanǵa jer aýdarylǵan ondaǵan myń polıaktarǵa qoldaý kórsetip, pana bolǵany úshin qazaq halqyna alǵysyn aıtty. Sondaı-aq ol Qazaqstanda turatyn etnıkalyq polıaktardyń tól mádenıeti men tilin úırenýine barlyq jaǵdaı jasalǵany úshin rızashylyǵyn bildirdi.

Kezdesý qorytyndysy boıynsha taraptar barlyq deńgeıdegi yntymaqtastyqty odan ári keńeıtý týraly kelisti.