EQYU Bas hatshysy Qazaqstannyń tóraǵalyǵy kezinde Uıym keńistigindegi kóptegen daǵdarysty máselelerdiń sheshiletinine senimdi
Ol bul pikirin búgin Astanada Qazaqstannyń Memlekettik hatshysy - Syrtqy ister mınıstri Qanat Saýdabaevpen kezdesýinen keıingi brıfıngte bildirdi, dep habarlaıdy QazAqparat.
M. Brıshambo Qazaqstanǵa Astananyń EQYU-ǵa tóraǵalyǵyna daıyndyǵynyń sońǵy kezeńinde saparmen kelip otyrǵandyǵyn aıta kele: «Afınyda EQYU-ǵa múshe elder Syrtqy ister mınıstrleriniń qorytyndy otyrysy ótedi. Qazaqstannyń 2010 jyly EQYU tóraǵalyǵyndaǵy jumysy kóp jaǵdaıda sol otyrysta qabyldanatyn sheshimderge baılanysty bolady. Bul kezdesýde talqylanatyn máselelerdiń ishinde qaýipsizdik, daý-janjaldarǵa jol bermeý, adam quqyǵy bar. Atalmysh kezdesýdiń aıasynda Qazaqstan 2010 jyly Astanada EQYU-nyń joǵary deńgeıdegi sammıtin ótkizý týraly máseleni talqylaýǵa qulyq tanytyp otyr. Sondyqtan da 2010 Qazaqstan úshin óte qaýyrt jyl bolady. Munda konsýltatsııalar úshin túrli ókilder keledi. Kelesi jyly biz kóptegen daǵdarysty máseleler boıynsha, sondaı-aq yqtımal daǵdarysty jaǵdaılardyń aldyn alý úshin sheshim taba alatyndyǵymyzǵa senimdimin», dedi.