Ekvadorda esirtki mafııasy men eldiń qarýly kúshteri qaqtyǵysyp jatyr
Jańa prezıdent Danıel Noboa seısenbi kúni 22 mafııalyq topty lańkestik uıym dep atap, elde ishki qarýly qaqtyǵys júrip jatqanyn aıtty.
Bir kún buryn túrmeden mafııalyq toptardyń biriniń jetekshisi joǵalyp ketkennen keıin prezıdent Noboa elde tótenshe jaǵdaı jarııalady. Tótenshe jaǵdaı polıtsııa men áskerılerge keńeıtilgen ókilettilikti, qoǵamdyq jıyndarǵa tyıym salýdy jáne komendanttyq saǵatty qamtamasyz etedi.
Ekvadordaǵy áleýmettik jeli qoldanýshylary seısenbi kúni kóshelerdegi qarýly adamdardy, órtengen kólikterdi, tipti jarylystardyń vıdeolary men fotosýretterin jarııalady.
Seısenbi kúni keshkisin polıtsııa qaqtyǵystar kezinde 10 adamnyń qaza tapqanyn habarlady.
Telarnany basyp alý
Seısenbi kúni betperde kıgen bir top qarýly adam tikeleı efır kezinde Gýaıakıl portyndaǵy TS telestýdııasyna basyp kirdi. Olar telearna qyzmetkerlerine edenge jatýdy buıyrdy. Kadr syrtynda atys pen aıqaı estildi.
Kóp uzamaı tikeleı efır úzildi. Artynsha qarýlanǵan adamdar telearna ǵımaratynan shyǵyp, biraz ýaqyttan keıin polıtsııa olardyń barlyǵy qamaýǵa alynǵanyn aıtyp, edende qoldary baılanǵan adamdardyń sýretterin jarııalady.
Ekvador polıtsııasynyń basshysy Sezar Sapata jýrnalısterge 13 adamnyń ustalǵanyn, olardan birneshe atys qarýy, eki granata men jarylǵysh zat tabylǵanyn aıtty.
Polıtsııanyń habarlaýynsha, telearnanyń barlyq qyzmetkerleri aman.
Polıtsııa men áserılerge shabýyl
Ekvador jáne halyqaralyq baspasózdiń habarlaýynsha, dúısenbi jáne seısenbi kúnderi eldiń ár aımaǵynda, onyń ishinde el astanasy Kıtoda jeti Ekvador polıtsııasynyń qyzmetkeri kepilge alynǵan.
Kýenka qalasynda belgisiz bireýler áskerı júk kóligine qoldan jasalǵan bomba laqtyrǵan. Polıtsııanyń habarlaýynsha, Esmeralda provıntsııasynda úsh ret jarylǵysh zat qoldanylǵan.
Ekvadordyń taǵy birneshe jerinde jarylys boldy.
Birneshe qalada qaraqshylar kólikterdi órtep jiberdi. Sonymen birge Kıtoda polıtsııa otqa oranǵan bir kólikten gaz ballondaryn tapty, qylmyskerler olardy jarylýy múmkin dep kútken bolýy múmkin.
Túrmedegi tártipsizdikter
Ekvadordyń 24 provıntsııasynyń altaýyndaǵy túrmelerde tártipsizdikter boldy, keıbir jaǵdaılarda kúzetshiler kepilge alyndy, dep habarlady Ekvador túrme basshylyǵy SNAI.
Arnaıy polıtsııa men áskerı jasaqtar El Oro, Loha, Chımboraso, Sotopashı, Asýaı jáne Pıchıncha provıntsııalaryndaǵy túrmelerdegi tártipsizdikterdi basýǵa májbúr boldy. Artynsha áskerıler túrme aýlalarynda sarbazdardyń qorshaýynda turǵan jartylaı jalańash tutqyndardyń sýretterin jarııalady.
Seısenbi kúni And taýyndaǵy túrmeden 32 tutqyn qashyp shyqty, olardyń arasynda Los-Lobos mafııa tobynyń jetekshisi Fabrısıo Kolon Pıko da bar. Ol eldiń bas prokýroryn óltirýdi josparlady degen aıyppen juma kúni ǵana qamaýǵa alynǵan bolatyn.
Qashqyndardyń 20-sy dereý ustaldy, biraq qalǵandary áli qashyp júr, olardyń qatarynda Pıko da bar.
Prezıdent Noboa túrmedegi tártipsizdikter - onyń túzeý mekemesin baqylaýǵa alý áreketine mafııanyń reaktsııasy ekenin aıtty.
Kórshiler shekara kúzetin nyǵaıtyp jatyr
Perý úkimeti seısenbi kúni Ekvadormen soltústik shekarada tótenshe jaǵdaı jarııalady. Premer-mınıstr Alberto Otarola polıtsııaǵa kómektesý úshin shekaraǵa qosymsha kúsh jiberiletinin málimdedi.
Іshki ister mınıstri shekaraǵa qosymsha polıtsııa bólimsheleri jóneltiletinin buǵan deıin de habarlaǵan. Kórshiles el tártipsizdikter men zańsyzdyqtardan qashqan ekvadorlyqtar elge qashyp kiredi dep qaýiptenedi.
Búlik neden bastaldy
Ótken jyldyń qazan aıynda Ekvadordaǵy prezıdent saılaýynda jeńiske jetken Danıel Noboa elde oryn alǵan qylmys tolqynyn aýyzdyqtaýǵa ýáde berdi.
Ekvador uzaq ýaqyt boıy ózara shıelenisteri bar eki iri kokaın óndirýshi el - Kolýmbııa men Perýdiń ortasynda tirshilik etip kele jatqan tynysh aral. Biraq sońǵy jyldary esirtki mafııasynyń toptary bul elde de kúsheıdi.
Ekvadorda kisi óltirý kórsetkishi 2018-2022 jyldar aralyǵynda tórt esege ósti. 2022 jyly 17 mıllıon halqy bar elde 7800 adam qaza tapty. Sol jyly polıtsııa 220 tonna esirtki tárkiledi.
Túrmelerdegi qandy qaqtyǵystar bólek máselege aınaldy: 2021 jyldyń aqpan aıynan beri 460-tan astam tutqyn qaza tapty.
Brıtandyq Financial Times gazeti jazǵandaı, mafııa Ekvadorda 2007-2017 jyldar aralyǵynda bılik etken solshyl prezıdent Rafael Korrea tusynda órkendeı bastady. Onyń tusynda bılik Tynyq muhıtyndaǵy Ekvador porttary arqyly esirtki tasymalyna kóz juma qarady.
Biraq esirtki saýdasy bandıtızmge ulasty, al Korreanyń muragerleri budan bylaı onymen kúrese almady.