EKU-men bosanǵan áıel: «Ańsaǵan sábı» baǵdarlamasy arqyly ana ataný baqyty buıyrdy

ÓSKEMEN. QazAqparat – Shyǵys Qazaqstan oblysynda «Ańsaǵan sábı» baǵdarlamasy boıynsha tuńǵysh náreste jaryq dúnıe esigin ashty. Shekesi torsyqtaı uldyń salmaǵy - 3661 gramm, boıy - 52 sm. Alǵash ret ana atanyp otyrǵan Alena Dolgıh osyndaı ıgi baǵdarlamanyń iske asyrylýyna muryndyq bolǵan Memleket basshysy Qasym-Jomart Toqaevqa óz alǵysyn bildirdi, dep habarlaıdy QazAqparat tilshisi.

Ata-ana atanyp otyrǵan erli-zaıypty osy qýanyshty 2016 jyldan beri kútken. Alena Dolgıhtyń aıtýynsha, birneshe jyl boıy bala kótere almaǵandyqtan áýeli Óskemendegi Ana men bala ortalyǵyna baryp qaralypty. Sondaǵy dárigerler em-dom taǵaıyndaǵanymen, odan esh nátıje bolmaǵan.

«2020 jyly EKO-ǵa kvota alý úshin qujattarymdy jınap, tıisti jerge ótkizdim. Biraq shynymdy aıtsam kezegim osynshama tez keledi dep oılamaǵan edim. Oǵan Prezıdentimiz Qasym-Jomart Toqaevtyń «Ańsaǵan sábı» baǵdarlamasyn iske qosýy sebep boldy. Osynyń arqasynda kvota sany artyp, kezek tez jyljydy. Sol úshin Memleket basshysyna zor alǵys!», - dedi 35 jastaǵy áıel.

Sodan soń emhana tańdap, analızder tapsyrýǵa kóshken. Qajetti qujattardy jınaýǵa da kóp ýaqyt ketpepti.

«Qudaıǵa shúkir, bári oıdaǵydaı boldy. Elordaǵa baryp, ekstrakorporaldy uryqtandyrý jasattym. Birinshi retten oń nátıje bolyp, qursaǵyma sábı bitti», - dedi Alena Dolgıh.

Osylaısha, áıel Shyǵys Qazaqstan oblysynda «Ańsaǵan sábı» baǵdarlamasy boıynsha tuńǵysh náresteni dúnıege ákeldi. Uldyń salmaǵy - 3661 gramm, boıy - 52 sm.

«Ózimizdi sondaı baqytty sezinýdemiz. Barlyq jumystar tegin bolyp, otbasymyzdan esh shyǵyn shyqqan joq. Ulymyzdyń atyn Mark dep qoıdyq», - dedi azamatsha.