Ekstremızmdi nasıhattaıtyn kúshtermen kúresýge qoǵamdyq uıymdardy kóbirek tartý kerek - Din isteri komıteti

ASTANA. QazAqparat - Ekstremızdi nasıhattaıtyn kúshtermen kúresý úshin qoǵamdyq uıymdardy kóbirek tartý kerek. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Mádenıet jáne sport mınıstrligi Din isteri komıtetiniń tóraǵasy Ǵalym Shoıkın málim etti.

«Áleýmettik jeliler men ınternet-resýrstarda dinı ekstremızmdi nasıhattaıtyn túrli aqparattar barshylyq. Soǵan qatysty Din isteri komıteti Mádenıetter men dinderdiń halyqaralyq ortalyǵy ınternet salasyn turaqty túrde saralap keledi. Sonymen qatar komıtet dinı jáne qoǵamdyq uıymdarmen birlese otyryp, durys aqparatty taratatyn arnaıy ınternet-portaldar men saıttardy, áleýmettik jelilerde akkaýnttardy ashyp, osy tásilder arqyly din týraly týra aqparatty taratý sharalaryn atqarýdamyz», - dep toqtaldy Shoıkın.

Onyń sózine qaraǵanda, QMDB janynda 20-ǵa jýyq saıttar qurylyp, belsendi qyzmet atqarýda.

«Bizdiń oıymyzsha, osy jumystardy ári qaraı da belsendi júrgizý qajet. Bul turǵyda qoǵamdyq uıymdardy kóbirek tartý kerek dep sanaımyz», - dedi komıtet basshysy.