Ekstremıster qolynan qaza tapqan áskerılerdi eske alýǵa arnalǵan týrnır ótti
Sambo kúresinen birinshilikti uıymdastyrýshy - QR Ulttyq ulany.
Bozkilemge óńirlik qolbasshylyq komandalarynan «Ońtústik», «Ortalyq», «Batys», «Shyǵys», Nur-Sultan qalasynyń 5573 áskerı bóliminen jáne QR Ulttyq ulanynyń Áskerı ınstıtýtynan 70-ke jýyq sportshy shyqty.
Onyń ishinde 1 balýan – halyqaralyq sanattaǵy sport sheberi, 8-i – sport sheberi, 22-si – sport sheberine kandıdat.
Jarys bastalar aldynda qatysýshylar qyzmettik boryshyn oryndaý kezinde qaza tapqan áriptesterin bir mınýt únsizdikpen eske alyp, memorıaldyq taqtaǵa gúl shoqtaryn qoıdy.
Jarys qorytyndysy boıynsha jalpy komandalyq esepte birinshi oryndy «Batys» óńirlik qolbasshylyq komandasy ıelendi, onyń qorjynynda tórt sanat boıynsha 4 altyn medal boldy. Ekinshi orynǵa 5573 áskerı bóliminiń (Nur-Sultan qalasy) komandasy taban tiredi. Úshinshi oryn «Ońtústik» óńirlik qolbasshylyq komandasyna buıyrdy.
Eske sala keteıik, 2016 jyldyń 5 maýsymynda 17 adamnan turatyn ekstremıstik top Aqtóbe qalasyndaǵy eki qarý-jaraq dúkenine shabýyl jasap, áskerı bólim aýmaǵyndaǵy qarý-jaraq qoımasyn basyp almaq boldy. Qarýly qylmyskerlerdiń tosyn shabýylyna toıtarys berý kezinde QR UQK «Batys» óńirlik qolbasshylyq komandasy áskerı barlaý bóliminiń aǵa jedel ýákili, maıor Danıel Maılybaev, kelisimshart boıynsha áskerı qyzmetshi kishi serjant Berikjan Qalıev jáne jedel qyzmet áskerı qyzmetshisi, qatardaǵy jaýynger Dosbol Sapar erlikpen qaza tapty.
QR Prezıdentiniń Jarlyǵymen maıor Danıel Maılybaev II dárejeli «Aıbyn» ordenimen marapattaldy, oǵan qaıtys bolǵannan keıin podpolkovnık áskerı ataǵy da berildi. Kishi serjant Berikjan Qalıev pen qatardaǵy jaýynger Dosbol Sapar qaıtys bolǵannan keıin III dárejeli «Aıbyn» ordenimen marapattaldy. Budan bólek, ІІІ dárejeli «Aıbyn» ordenimen qatardaǵy jaýynger Baqtııar Qaıyrbekov, «Jaýyngerlik erligi úshin» medalimen qatardaǵy jaýyngerler Syrym Súndetov pen Denıs Chernyshov laıyqtaldy.