Ekstremaldy foto, qamalǵan balalar: TJD qyzmetkerleri qutqarý operatsııalaryn eske aldy
ShQO TJD baspasóz qyzmetiniń málimetinshe, 2023 jyly barlyǵy 215 adam qutqarylyp, túrli tótenshe jaǵdaılarǵa tap bolǵan 410 azamat evakýatsııalandy. Departament qyzmetkerleri 65 balaǵa kómekke kelip, 59 janýardy qutqaryp qaldy. Jyldy qorytyndylaı kele, erekshe este qalǵandary tómendegiler boldy:
Ekstremaldy foto
Rıdder qalasynda bir top jas taýly ári ormandy jerge baryp demalǵan. Er adamdardyń biri kóz tartar ádemi kórinisti sýretke túsirý úshin bıik aǵashqa órmelep shyqty. Alaıda aıaǵy taıyp ketip, qulap túsip, aýyr jaraqat alǵan. №1 mamandandyrlǵan órt sóndirý bólimshesiniń qyzmetkerleri ony taýdan jedel járdem kóligine deıin zembilmen tasymaldady.
«Saqına» operatsııasy
12 aıdyń ishinde óńir boıynsha 22 adam saýsaǵynan saqınany sheshe almaı qutqarýshylardy shaqyrtqan. Olardyń bárine de kómek kórsetildi.
Qamalyp qalǵandar
65 bala esigi jabylyp qalǵan úıde qalyp qoıǵan. TJD qyzmetkerleri dereý jetip, balalardy shyǵardy.
Budan bólek, Óskemende abaısyzda avtokólik esigi jabylyp qalyp, onyń ishinde bir jasar bala qalyp qoıǵan. Anasy «112» nómirine qońyraý shalyp, kómek surady. Sóıtip, qutqarýshylar esikti ashyp berdi.
Rıdderde oınap júrgen qarshadaı qyz aýladaǵy aǵashqa órmelep shyǵyp, túse almady. Ol qatty qorqyp, jylap otyrǵan kezde №14 órt sóndirý bóliminiń qutqarýshylary 8 metr bıiktikke kóterilip, balany qolyna alyp, jerge túsirdi.
Janýarlarǵa kómek
Bir jyl ishinde 17 mysyq qutqarylǵan. Óskemen ákimdigi ǵımaratynyń syrtqy qaptamasyna qysylyp qalǵan marǵaý shyǵaryldy. Ol soqyr bolyp shyqty. Qutqarýshylar marǵaýdy zooklınıkaǵa tapsyryp, onda ol emdelip, kóp uzamaı ózine ıe tapty.
Bıyl Óskemende bolǵan órt kezinde órt sóndirýshiler 35 ara uıasyn (árqaısysynda 30 myń ara bolǵan) qutqardy. Sondaı-aq 37 ıt tótenshe jaǵdaıǵa tap bolǵan. Barlyq oqıǵada tórt aıaqtylarǵa der kezinde kómek kórsetildi.