Eksporttaýshylardyń jańa naryqtarǵa shyǵýyna qoldaý kórsetý kerek - UEM

ASTANA. QazAqparat – Eksporttaýshylardyń jańa naryqtarǵa shyǵýyn qoldaý kerek. Bul týraly Úkimet otyrysynda Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«Ekonomıkalyq ósimdi qamtamasyz etý maqsatynda ortalyq jáne jergilikti atqarýshy organdarǵa kelesi is-sharalarǵa nazar aýdarý usynylady. Birinshiden, ınflıatsııaǵa qarsy den qoıý is-sharalaryn tıisti deńgeıde iske asyrý jáne otandyq azyq-túlik taýarlaryn óndirýshilerge qoldaý sharalaryn kórsetý qajet. Ekinshiden, salynyp jatqan nysandardy ýaqytyly paıdalanýǵa berý boıynsha baqylaýdy qamtamasyz ete otyryp, qurylys jumystary maýsymyn tıimdi júrgizý kerek», - dedi mınıstr.

Onyń aıtýynsha, úshinshiden, ınvestorlardy tartý jáne súıemeldeý boıynsha naqty jumysty barlyq deńgeılerde jandandyrý qajet.

Tórtinshiden, eksporttaýshylardyń jańa naryqtarǵa shyǵýyn qoldaý, eksporttaý baǵyttarynyń balamaly joldaryn qalyptastyrý kerek.

«Besinshiden, bıznes ókilderin keshendi qoldaý jáne olar úshin qolaıly jaǵdaı jasaýdy qamtamasyz etý qajet», - dedi Álibek Qýantyrov.