«Eksporttaýshy ónerkásiptiń tabysy eselenedi» - baspasózge sholý
«Eksporttaýshy ónerkásiptiń tabysy eselenedi» - baspasózge sholý
***
«Egemen Qazaqstan» gazetiniń búgingi sanynda Ońtústik Qazaqstan oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl departamentiniń basshysy Murat Ahmetovtiń «Kásibı apparat memlekettik qyzmettiń abyroıyn asyrady» degen taqyryptaǵy maqalasy jarııalandy. Maqalada avtor Ult jospary qoǵam men memleketti qaıta ózgertýge baǵyttalǵan, odan ári órkenıetke bastaıtyn qujat ekendigin basa atap ótken. Onyń paıymynsha, el kelesheginiń tabysty bolýyna jeteleıtin bul qujat aǵymdaǵy tarıhı satyda elimiz úshin aıryqsha jáne joǵary strategııalyq qundylyqqa ıe. 100 naqty qadamnyń qaı-qaısysy da ózekti máselelerdi qamtyǵan. Basty nazar kásibı memlekettik apparatty qurýǵa baǵyttalǵanyn erekshe aıta ketý abzal. «Adamzatqa erteden tanys sybaılas jemqorlyq zamanmen birge ósip-órkendep, nebir tegeýrindi qarsylyqtarǵa tótep berip, qaıda mol qarajat paıda bolsa, sol jerge tamyr jaıyp, búginge deıin joıylmaı otyrǵan qaýipti keseldiń biri. Osy qubylyspen kúresý týraly 13-qadamda: «Jemqorlyqqa qarsy kúresti kúsheıtý, sonymen birge, jańa zańnamalar ázirleı otyryp, memlekettik qyzmet isteri jáne jemqorlyqqa qarsy is-qımyl agenttiginiń qurylymynda jemqorlyq quqyq buzýshylyqtyń júıeli túrde aldyn alý jáne saýyqtyrý úshin jemqorlyqqa qarsy arnaıy bólim qurý» qajettigi kórsetilgen. Bul uıym jemqorlyqqa jol beretin komandalyq aýys-túıisti boldyrmaýǵa jáne qyzmettik is-áreket jetistikteriniń «jadyn» saqtap qalý úshin qajet dep oılaımyn», - dep jazady avtor.
Elimizdegi valıýtalyq dálizdiń joıylyp, aıyrbas baǵamynyń erkindikke jiberilýi baǵanyń sharyqtaýyna jol bermeıdi. Qaıta kóptegen kásiporyndardyń, ásirese, eksporttaýshy ónerkásip oryndarynyń tabysy eselene túspek. «Egemen Qazaqstan» gazetiniń jazýynsha, bul týraly Shyǵys Qazaqstan oblystyq kásipkerlik jáne ındýstrııalyq-ınnovatsııalyq damý basqarmasynyń basshysy Nurlan Mýsın málimdegen. Basylymnyń jazýyna qaraǵanda, Elbasynyń «100 naqty qadam» aıasyndaǵy tapsyrmalaryn oryndaýǵa baılanysty atqarylǵan jumystarmen tanystyrǵan basqarma jetekshisi elimizde kóptegen memlekettik baǵdarlamalar júzege asyrylyp, ekonomıkamyzdyń ǵana emes, áleýmettik salanyń órleýi baǵytynda naqty sharalar qolǵa alynǵanyn atap ótti. Údemeli ındýstrııalyq-ınno¬vatsııalyq damý baǵdarlamasynyń aldaǵy besjyldyǵy da ekonomıkany jańǵyrtýǵa baǵyttalǵan. Josparǵa sáıkes, 2015-2019 jyldar aralyǵynda 535,8 mıllıard teńgeniń 30 jobasy júzege asyrylady. Bıyl 13 joba iske asyrylyp, 700 adam jumys ornymen qamtamasyz etiletin bolady. Maqala «Eksporttaýshy ónerkásiptiń tabysy eselenedi» degen taqyryppen berilgen.
***
Mádenıet jáne sport mınıstrligi, «Qazaqfılm» AQ jáne Almaty qalasy ákimdiginiń qoldaýymen «Eýrazııa» halyqaralyq kınofestıvali «Sháken juldyzdary» kınofestıvalimen birigip, qala kúnine erekshe syı ázirlep otyr. Bul jaıynda «Aıqyn» gazetiniń senbilik sanyndaǵy «Hakerdi» halyq qashan kóredi?» degen taqyryptaǵy maqalada aıtylǵan. Basylymnyń jazýynsha, sharanyń saltanatty ashylýy ádettegideı álemdik jáne otandyq óner maıtalmandary men jas artısterdiń qyzyl kilemmen júrip ótý rásimimen bastalady. Odan keıin jurtshylyq nazaryna «Reketır», «Jaýjúrek myń bala» eńbekterimen esimi elge tanys otandyq rejısser Aqan Sataevtyń kanadalyq áriptesterimen birlesip túsirgen «Haker» atty jańa týyndysy usynylady.
«Jer betinde ómirge kelgen árbir elýinshi bala aýtızm dertine shaldyǵady. Al Qazaqstanda she? Aýtızm dertiniń bala týa salysymen anyqtalmaıtyndyǵynan bul dıagnozdy á degennen anyqtaý qıyn. Dese de, mamandar sońǵy jyldary aýtızmge shaldyqqandar sany artyp bara jatqanyn aıtady», - dep jazady «Aıqyn» gazeti «Aýtızmge shaldyqqan bala qalaı bilim alady?» degen taqyryptaǵy maqalasynda. Basylymnyń jazýynsha, keshe Astanada mekteptik jáne mektepaldy mekemelerdegi aýtızmge shaldyqqan balalardy ıntegratsııalaý máselelerine arnalǵan konferentsııada sońǵy bir jyldyń ózinde elimizde aýtızm dertimen tirkelgender sany 2 myńnan asqany aıtylǵan. Al ǵalamtordaǵy derekter 7 myń deıdi. «Konferentsııa qatysýshylary úshin Dúnıejúzilik arnaıy bilim berý jáne qyzmet kórsetý halyqaralyq qaýymdastyǵynyń atqarýshy dırektory Tomas Pıter Gýmpeldiń baıandamasy qyzyqty boldy dep oılaımyz. Óıtkeni ol ınklıýzıvti baǵyt arqyly múmkindigi shekteýli balalardy oqýda jetistikke jetýge yqpal etip, jaqsy ómir súrý múmkinshiligin qalyptastyrýǵa bolady degen pikirdegi ǵalym. AQSh, Ońtústik Amerıka, Lıýksembýrg, Irlandııa jáne Azııa elderindegi jetekshi ınstıtýttarda arnaıy bilim berý salalarynda súbeli zertteý júrgizgen, kóptegen ǵylymı maqalalar jazǵan ǵalym», - deıdi maqala avtory.