Eksporttalatyn ónim jelisi keńeıtildi – mınıstr

NUR-SULTAN. QazAqparat – Búgin Úkimet otyrysynda QR Aýyl sharýashylyǵy mınıstri Saparhan Omarov eksporttalatyn ónim jelisi týraly túsinik berdi, dep habarlaıdy QazAqparat tilshisi.

Mal sharýashylyǵy ónimderin ótkizýge qosymsha naryqtar ashý múmkindigine toqtalǵan mınıstr, «Qytaı Halyq Respýblıkasymen ónimniń 20 túrine, Iranmen ónimniń 6 túri boıynsha, Parsy shyǵanaǵy elderimen ónimniń 6 túri boıynsha veterınarııalyq-sanıtarııalyq talaptar kelisildi. Sheteldik kásiporyndar tizilimine barlyǵy 2 728 qazaqstandyq óndirýshiler, onyń ishinde 250 kásiporyn úshinshi elder (QHR, BAÁ, EO, Ózbekstan, Japonııa) tizilimine jáne 2 478 kásiporyn EAEO tizilimine engizildi», - dedi.

Onyń sózine qaraǵanda, eksporttalatyn ónim jelisi 480-nen 551 taýar toptaryna deıin keńeıtildi jáne qazaqstandyq ónimdi ımporttaýshy elderdiń tizbesi 65-ten 72 memleketke deıin ulǵaıdy.

Budan buryn habarlanǵandaı, Premer-Mınıstr veterınarııa mamandyǵyna bilim granttaryn kóbeıtýdi tapsyrdy.