EKSPO úshin salynǵan úılerdi qanshaǵa satyp alýǵa bolady
«EKSPO aýmaǵynda ornalasqan kóppáterli turǵyn úı keshenindegi baspanalardyń sharshy metriniń quny satyp alýdyń tańdalǵan ádisine baılanysty ózgermeıdi. ıAǵnı, turǵyn úılerdiń 1 sharshy metri 399 900 teńgeni, al kólik orny 735 000 teńgeni quraıdy», - dedi Asqarbek Óserbaev Ortalyq kommýnıkatsııalar qyzmetinde ótken baspasóz máslıhatynda.
Habarlanyp otyrǵandaı, bir bólmeli páterlerdiń aýmaǵy 39,6-dan 51 sharshy metr, eki bólmeliler 57,1-80,6 sharshy metr, úsh bólmeliler 81,1- 106 sharshy metr, tórt bólmeliler 105-123,4 sharshy metr aralyǵynda.
«Turǵyn úı jaılylyqtyń ІІ sanatyna saı keledi jáne taza árlengen kúıde ótkiziledi», - dedi ol.
Aıta ketsek, otandyq jáne sheteldik delegatsııalardy ornalastyrý úshin «EKSPO-2017» kórme-kesheniniń aýmaǵynda kópqabatty 42 úı salynǵan bolatyn. Búginge deıin olardan 148 páter men 103 kólik orny satylyp ketti. Jyljymaıtyn múlikti satyp alýǵa Digital Baiterek onlaın-platformasy arqyly barlyǵy 1547 ótinim kelip túsken.
Kompanııa ókiline sonymen birge atalmysh úılerdi kimder satyp alýy múmkin ekeni týraly suraq qoıyldy.
«Bizdiń oıymyzsha, EKSPO aýmaǵyndaǵy úılerdi satyp alýǵa eń birinshiden jalaqysy ortasha aılyqtan joǵary azamattar satyp alady. Demek, bizdiń oıymyzsha, olar - iri jetekshiler, bıznes ókilderi, kvazımemlekettik sektordyń ókilderi bolýy múmkin. Meniń sýbektıvti pikirim boıynsha, satyp alyp jatqandar astanalyqtar dep oılamaımyn. Aımaqtaǵy bıznes ókilderi men elıtalar osy páterlerge qyzyǵýshylyq tanytýda. Sebebi, páterlerdiń ornalasqan jeriniń ózi, ınfraqurylymy jaqsy. Máselen, turǵyn úılerdiń janynda Nazarbaev Ýnıversıteti, Mega Sılk Ýeı, Hılton qonaq úıi tur. Prezıdenttiń EKSPO aýmaǵynda jaqynda Astana habty ashqanyn bilesizder. Bunyń bárin eskersek, bizdiń oıymyzsha, satyp alýǵa nıet bildirgender kóp bolady», - dedi Asqarbek Óserbaev.
Eske salsaq, 2018 jyldyń 16 qańtarynan bastap kórme aýmaǵyndaǵy úılerdi satyp alýǵa ótinimderdi qabyldaý ýaqytsha toqtatylǵan edi.
Búgin Asqarbek Óserbaev páterlerdi satý qaıta bastalǵanyn jáne olardy ıelenýdiń sharttaryn atady.