EKSPO kórmesiniń mańyzdy mádenı sharasy P.Chaıkovskıı atyndaǵy jasóspirimder baıqaýy bolady

ASTANA. QazAqparat - Mereıtoılyq H Halyqaralyq Petr Ilıch Chaıkovskıı atyndaǵy jasóspirimder baıqaýy Astana qalasynda 2017 jyldyń 15-25 maýsymy aralyǵynda ótedi. Bul týraly «Qazaq ulttyq óner ýnıversıtetiniń rektory» MM rektory Aıman Musaqojaeva, P.I. Chaıkovskıı atyndaǵy Halyqaralyq konkýrs laýreattar qaýymdastyǵynyń bas dırektory Andreı Şerbaktyń qatysýymen ótken baspasóz máslıhatynda belgili boldy.

Baıqaý 17 jasqa deıingi mýzykanttar arasynda fortepıano, skrıpka jáne vıolonchel mamandyqtary boıynsha ótkiziledi. Baıqaýdy uıymdastyrýshylar: QR Mádenıet jáne sport mınıstrligi, Qazaq Ulttyq óner ýnıversıteti jáne P.I.Chaıkovskıı atyndaǵy Halyqaralyq baıqaý laýreattarynyń qaýymdastyǵy. Baıqaý P.I.Chaıkovskıı atyndaǵy Máskeý memlekettik konservatorııasynyń, Máskeý ákimshiliginiń jáne Astana qalasy ákimdiginiń qoldaýymen ótkiziledi.

Jasóspirimder baıqaýynyń  ereksheligi ol ártúrli elderde ótkiziledi, ári jas mýzykanttardyń álemniń barlyq elderinen qatysýyna múmkindik beredi. Halyqaralyq baıqaýdyń álemge áıgili P.I.Chaıkovskııdiń atymen tyǵyz baılanysy (jasóspirimder baıqaýynyń jeńimpazdary «eresekter» baıqaýyna qatysýǵa usynylady), qatysýshylar sanynyń kóptigi jáne olardyń joǵary oryndaýshylyq deńgeıi, kúrdeli baıqaý baǵdarlamalary, mártebeli halyqaralyq tóreshiler, tyńdarmannyń jáne buqaralyq aqparat quraldarynyń asa joǵary qyzyǵýshyq bildirýi konkýrstyń jas mýzykanttar úshin naǵyz bedeldi halyqaralyq baıqaý dep sanaýǵa bolatyndyǵyn kórsetedi. 

Qazylar quramyna Reseı, Qazaqstan, AQSh, Koreıa, Qytaı, Frantsııa, Shveıtsarııa elderinen belgili mýzykanttary kiredi. Baıqaýdyń birinshi jáne ekinshi kezeńderi Qazaq Ulttyq óner ýnıversıtetiniń sahnalarynda, úshinshi kezeń - «Astana Opera» Opera jáne balet teatrynyń sahnasynda, al ashylý jáne jabylý saltanaty - «Qazaqstan» ortalyq kontsert zalynda ótedi. Baıqaýdyń fınalyna qatysýshylar sımfonııalyq orkestrlerdiń súıemeldeýimen shyǵarma oryndaıdy.

H Halyqaralyq P.Chaıkovskıı atyndaǵy jasóspirimder baıqaýy 2017 jyldyń 10 maýsymy men 10 qyrkúıegi aralyǵynda ótetin, basty taqyryby «Bolashaq energııasy» bolyp tabylatyn dúnıejúzilik EKSPO-2017 kórmesiniń mádenı baǵdarlamasynyń mańyzdy is-sharasy bolady dep kútilýde. 

1992 jyly negizi qalanǵan Halyqaralyq P.I.Chaıkovskıı atyndaǵy jasóspirimder baıqaýy, bul - jas pıanıster, skrıpkashylar jáne vıolonchelıster úshin asa iri kásibı baıqaý. Ashylǵaly beri bul  baıqaý Máskeý, Sankt-Peterbýrg, Novosibir (Reseı), Sendaı (Japonııa), Sývon (Koreı Respýblıkasy), Sıamyn (QHR), Montre-Veve (Shveıtsarııa), Kýrasıkı (Japonııa) qalalarynda ótken bolatyn. 
Eske sala ketsek, 4 qarashada «Shabyt» festıvaline qarsańynda «Shabyt» óner ýnıversıtetiniń rektory Aıman Musaqojaeva Qazaqstan Chaıkovskıı atyndaǵy halyqaralyq konkýrsty ótkizýge ábden laıyq el dep málim etken edi.