Ekskýrsııamen elordadan Qyzylordaǵa barǵan jasóspirim darııaǵa batyp ketti
Oqıǵa búgin, 6 maýsymda Qarmaqshy aýdanyndaǵy Qorqyt ata kesenesi tusyndaǵy darııa aýmaǵynda bolǵan.
«Tótenshe jaǵdaılar qyzmetine jergilikti ýaqytpen saǵat 10.13 shamasynda aýdandyq polıtsııa bóliminen habarlama kelip tústi. Onda 2007 jyly týǵan jasóspirimniń kesene aýmaǵyndaǵy Syrdarııa ózenine batyp ketkeni aıtylǵan. Oqıǵa ornyna jedel qutqarý jasaǵynan Danyshbaı Esemuratov basqarǵan 5 qutqarýshy 1 tehnıkamen keldi. Saǵat 15.20-da izdestirý jumystary bastaldy. Saǵat 20.30-da izdeý ýaqytsha toqtatyldy. Ázirge nátıje joq», - dedi Qyzylorda oblystyq tótenshe jaǵdaılar departamenti órt sóndirý jáne avarııalyq-qutqarý jumystary qyzmetiniń baspasóz hatshysy Álııa Erejepova.
Málim bolǵanyndaı, jasóspirim anasymen birge Nur-Sultan qalasynan ekskýrsııalyq saparmen júrgen. Anasy kesene basynda belgisiz sebeppen balany joǵaltyp alǵan. Keıinnen jasóspirimniń darııaǵa batyp ketkeni anyqtaldy.
Eske salsaq, búgin Qyzylorda oblysy Qazaly aýdanynda zeınetker belgisiz jaǵdaıda sýǵa batyp ketti. Onyń denesin aýyl turǵyndary óz kúshimen sýdan alyp shyqty.