Eks-prezıdentterge beriletin artyqshylyqtar Tuńǵysh Prezıdentke de qatysty bolady - Máýlen Áshimbaev
Búgin Senattyń jalpy otyrysynan keıin tilshiler Tuńǵysh Prezıdent Nursultan Nazarbaevqa beriletin artyqshylyqtar týraly surady.
«Eks-prezıdentterge qandaı artyqshylyqtar beriletin bolsa, ıaǵnı áleýmettik jaǵynan qorǵalýy men qaýipsizdigine qatysty pursattardyń bári Tuńǵysh Prezıdentke de beriledi. Bul turǵyda eshkimniń de elden artyq dárejesi bolmaıdy. Bolashaqta Qazaqstanda biraz prezıdentter bolatyn shyǵar. Osy oraıda áleýmettik turǵydan qorǵaý, qaýipsizdigin qamtamasyz etetin normalar eks-prezıdentterge birdeı qatysty bolady. Bul normalar Konstıtýtsııada bar, sol normalardyń bári Tuńǵysh Prezıdentke qoldanylady», - dedi M. Áshimbaev.
Osy oraıda Senat tóraǵasy zańnamada eks-prezıdentterge qatysty arnaıy bap bar ekenin, onda tıisti normalar eskerilgenin eske saldy.
«Tıisti ózgerister enip jatyr solarǵa quqyqtyq negiz qalyptastyrý úshin referendým týraly zańnan Tuńǵysh Prezıdentke baılanysty normalardy referendýmge shyǵarýǵa bolmaıdy degen normalardy alyp tastadyq», - dedi ol.
Budan buryn habarlanǵandaı, búgin Senattyń jalpy otyrysynda «Respýblıkalyq referendým týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrý engizý týraly» Konstıtýtsııalyq zań jobasy qaraldy.
Qujatqa túzetý engizilgendikten zań jobasy Májiliske qaıtaryldy.
Senatorlar «Referendým týraly» Zańnan Elbasy týraly normany alyp tastady.