Ekojýrnalıstıka salalyq jýrnalısterdi daıarlaý baǵyttarynyń biri bolmaq

NUR-SULTAN. QazAqparat – Búgin elordada Aıda Balaeva QR Aqparat jáne qoǵamdyq damý mınıstrligi, ál-Farabı atyndaǵy Qazaq ulttyq ýnıversıteti jáne QR Ekologııa, geologııa jáne tabıǵı resýrstar mınıstrligi arasyndaǵy Ózara túsinistik pen yntymaqtastyq týraly memorandýmǵa qol qoıdy, dep habarlaıdy QazAqparat vedomstvonyń saıtyna silteme jasap.

Memorandýmnyń maqsaty - ekologııa salasynda mamandanǵan salalyq jýrnalısterdi daıarlaý. Qujat taraptardyń ekojýrnalısterdi daıarlaý máselesinde yntymaqtastyǵyn kózdeıdi. Taraptardyń árqaısysy óz quzyreti sheńberinde bolashaq jýrnalısterdiń kásibıligin arttyrýǵa jaǵdaı jasaýǵa nıetti.
Bul rette ekologııa máseleleri qoǵamda óte ózekti jáne keńinen jarııa etilýde ekendigin atap ótken jón. Tıisinshe osy salada tıimdi aqparattyq túsindirme jumystaryn júrgizýdi qajet etedi.
Memorandým aıasynda birqatar naqty is-sharalar ótkizilmek, onyń ishinde bilim berý baǵdarlamalary jetildiriledi, stýdentterdiń kásibı praktıkalary men taǵylymdamalary uıymdastyrylady, salalyq jýrnalıster pýly qurylady.
Nátıjesinde medıa naryqty ekologııa salasynda materıal izdeýge jáne maqala daıyndaýǵa mamandanǵan bilikti jýrnalıstermen qamtamasyz etý josparlanyp otyr.
Eske salsaq, qazirgi ýaqytta mınıstrlik salalyq jýrnalısterdi daıarlaý boıynsha jumys júrgizýde. Budan buryn medıtsına jáne din salalarynda mamandanǵan jýrnalısterdi daıarlaý úshin L. Gýmılev atyndaǵy EUÝ-men ózara túsinistik pen yntymaqtastyq týraly 2 memorandýmǵa qol qoıylǵan bolatyn.