Ekonomıkanyń naqty sektoryna nesıe bólýge bankterdi jumyldyrý kerek - Prezıdent
Memleket basshysynyń aıtýynsha, otandyq qarjy júıesi jumys istep turǵan barsha kezeńde paıyzdyq kanaldyń tolyqqandy iske qosylýyna qol jetkize almadyq. Bul óz kezeginde aqsha-nesıe saıasatyndaǵy tıimdilikti tómendetip otyr. Sebebi bul baǵyt ekonomıkany basqarýdyń basty tetikteriniń biri boldy.
Prezıdenttiń paıymynsha, osy problemany sheshý úshin qarjy salasyn retteýshiler men Úkimet tarapynan keshendi is-sharalar qajet.
Sonymen qatar Qasym-Jomart Toqaev monetarlyq saıasat salasyndaǵy kemshilikter qarjy sektoryn damytýdy tejep otyrǵanyn aıtty.
«Qazirgi kezde tutynýshylyq qaryzdardyń qarqyndy ósýi turǵysynda ekonomıkalyq belsendiliktiń negizgi faktory bolyp sanalatyn korporatıvti nesıeleý úlesi qysqaryp keledi. Bes jylda jalpy berilgen qaryzdardyń kóleminde 68 paıyzdan 41 paıyzǵa deıin azaıdy», - dedi Memleket basshysy.
Osy oraıda Prezıdent kez kelgen shaǵyn jobaǵa memlekettik damý ınstıtýttary nemese halyqaralyq qarjy ınstıtýttary esebinen nesıe bólý jaǵdaılary kezdesetinin synady.
«Bul rette bankterde 11 trln teńge somasynda ótimdiligi joǵary aktıvter bar. Shyn máninde, bul derekter alańdatatyn jaǵdaı bolyp otyr», - dedi Qasym-Jomart Toqaev.
Bul turǵyda Prezıdent QR Ulttyq banki men Qarjy naryǵyn retteý agenttigine Úkimet tıisti tapsyrmany júkteý kerektigin aıtty. Osy baǵytta ekonomıkanyń naqty sektoryn nesıeleýge bankterdi jumyldyrý úshin qosymsha tetikter men yntalandyrý qadamdaryn daıarlaý tapsyryldy.