Ekonomıkanyń birqatar salasyn demonopolızatsııalaý jónindegi jańa usynystar qaraldy

NUR-SULTAN. QazAqparat - QR Premer-Mınıstri Álıhan Smaıylov Úkimet janyndaǵy Ekonomıkany demonopolızatsııalaý jónindegi komıssııanyń kezekti otyrysyn ótkizdi, dep habarlaıdy QazAqparat tilshisi vedomstvonyń resmı saıtyna silteme jasap.

Otyrys barysynda qurylys jáne TKSh, kólik, avtojoldardyń jumys isteýi jáne ónerkásip salalaryn demonopolızatsııalaý boıynsha usynystar qaraldy. Indýstrııa jáne ınfraqurylymdyq damý mınıstri Qaıyrbek Óskenbaev tabıǵı monopolııalar sýbektileriniń jelilerine qosylý úshin tehnıkalyq sharttardy alý protsesiniń aıqyndylyǵy men ashyqtyǵyn qamtamasyz etý jumystyń negizgi baǵyttarynyń biri bolatynyn atap ótti.

Qazirgi tańda ınjenerlik jelilerdiń, qosylý núkteleriniń ornalasýy jáne bos qýat kózderi týraly senimdi jáne ashyq aqparattyń bolmaýy bul qyzmetterdiń qoljetimsiz bolýyna ákep soǵýda.

Jaǵdaıdy ózgertý úshin tabıǵı monopolııalar sýbektilerin tutynýshylardy qosý úshin jeliler, qosylý núkteleri jáne bos qýat kózeri boıynsha aqparatty tsıfrlandyrýǵa jáne júıeli túrde jańartyp otyrýǵa, sondaı-aq biryńǵaı tsıfrlyq alańda beriletin tehnıkalyq sharttardyń esebin engizýge mindetteý usynylady. Budan ári mınıstr jeke saraptama uıymdaryn Memlekettik saraptamanyń aqparattyq júıesin paıdalanǵany úshin alynatyn abonenttik tólemnen bosatý josparlanyp otyrǵanyn atap ótti.

Jańa turǵyn úılerdi salýǵa jáne paıdalanýǵa berýge qatysty – iri ınternet-baılanys operatorynyń monopolııasyn alyp tastaý kózdelip otyr. Búgingi kúni qurylys salýshylar is júzinde jańa turǵyn úıdi ınternetke qosýǵa bógde operatorlardy tartpaıdy, sondyqtan jańadan salynǵan úılerdiń turǵyndarynda telekommýnıkatsııa qyzmetteri turǵysynan tańdaý shektelgen. Qalyptasqan jaǵdaıdy ózgertý úshin kóp páterli turǵyn úılerdi salý kezinde birneshe baılanys operatoryn tartý qamtamasyz etiletin norma qabyldanady. Sondaı-aq ınternet-baılanys jelilerin júrgizýdi ınjenerlik jelilerdegideı, daıyn obektilerdi tapsyrý kezinde mindetti shart etý josparda bar.

Úkimet basshysy atalǵan usynystardy qoldady. Bul oraıda Álıhan Smaıylov IIDM-ge talqylaý barysynda synǵa ilikken birqatar ózge de sharalardy pysyqtaýdy jáne bir apta ishinde komıssııanyń qaraýyna jańartylǵan usynystardy engizýdi tapsyrdy.