Ekonomıkany «taza paraqtan» retteýdi kózdeıtin zań jobasy Úkimetke engizildi

NUR-SULTAN. QazAqparat – Kásipkerlikti jańasha retteý saıasatyn engizý úshin «Smart» retteý» jobasy qolǵa alynady, dep habarlaıdy QazAqparat tilshisi.

Úkimet otyrysynda Ulttyq ekonomıka mınıstri Áset Erǵalıev saladaǵy salyqtyq jeńildikter men zańnamalyq ózgerister týraly da aqparat berdi.

«2020 jylǵy 1 qańtardan bastap arnaýly salyq rejımderin qoldanatyn shaǵyn jáne mıkro kásipkerlik sýbektilerin tabys salyǵynan 3 jylǵa bosatý qoldanylady. Osy jyldyń birinshi qańtarynan bastap, Qyzmet kórsetý salalarynda alynǵan tabystyń 3% mólsherlemesimen bólshek salyqtyń jańa arnaıy rejımi engizildi. Aǵymdaǵy jyldyń birinshi sáýirinen bastap, birinshi shildesine deıin zardap shekken salalarda eńbekaqy tóleý qorynan salyqtardy tóleýdi keıinge qaldyrý múmkindigi beriletin boldy», - deıdi mınıstr.

Onyń sózinshe, «Atameken» Ulttyq kásipkerler palatasy 50 myńnan astam kásipkerlik nysanǵa saýalnama júrgizip, sonyń negizinde shaǵyn jáne orta bıznesti qoldaý jónindegi jańa sharalar paketi ázirlengen.

«2021 jylǵa arnalǵan ekonomıkalyq ósýdi qalpyna keltirý jónindegi ózektendirilgen keshendi jospar sheńberinde 60 astam qoldaý sharalary kózdelgen.

1. Bızneske júktemeni azaıtý, onyń ishinde birqatar salyqtyq jeńildikter jáne salyqtyq ákimshilendirýdi jeńildetý.

2. Kásipkerlerdiń qarjylandyrýǵa qol jetimdiligin jeńildetý.

3. Suranystaǵy naryqtarǵa qol jetkizý. Atalǵan baǵyt Memlekettik satyp alýlarǵa jáne kvazımemlekettik sektordyń satyp alýlaryna qoljetimdilikti jeńildetýge baǵyttalǵan sharalar kózdelgen.

4. «Smart» retteý kásipkerlik salasynda jańa retteý saıasatyn engizýdi kózdeıtin zańdy ázirleý men qabyldaýdy qamtıtyn bolady», - dedi vedomstvo basshysy.

Áset Erǵlaıev jańa ekonomıkalyq jaǵdaıda salany retteýdiń jańa saıasaty ázirlenip jatqanyn atap ótti.

«Bızneske júktemeni túbegeıli tómendetý, ońtaıly jáne tıimdi rettegish júıeni qalyptastyrý maqsatynda kásipkerlik qyzmetti «taza paraqtan» retteýdiń jańa tásilderi qalyptastyrylýda. Onyń ishinde memleket pen kásipkerliktiń ózara is-qımylynyń bazalyq qaǵıdattaryn jetildirý, talaptardy belgileý sharttary, retteýshilik apellıatsııa ınstıtýty, eksperımenttik quqyqtyq rejım, mindetti talaptar tizilimi, eseptilik, baqylaýdaǵy táýekel-taldaýdy avtomattandyrý, memlekettik baqylaýdy jetildirý sharalary qamtylǵan.

Búgingi tańda tıisti zań jobasy barlyq memlekettik organdarmen kelisilip, Úkimettiń qaraýyna engizildi», - dedi mınıstr.