Ekonomıkamyzdy damytýǵa arnalǵan birqatar mańyzdy zańdar qaralady – Senat tóraǵasy
- Taıaýda «Ana tili» gazetinde Prezıdentimiz Qasym-Jomart Kemeluly Toqaevtyń kólemdi suhbaty jarııalandy. Ózderińiz óńirlerde azamattarmen kezdesýler ótkizip, suhbattyń negizgi oılaryn halyqqa jetkizýge úles qostyńyzdar. Memleket basshysy suhbatta 2024 jyly ár sala boıynsha atqarylǵan jumystardy qorytyndylap, aldaǵy basym baǵyttardy belgilep berdi. Sondaı-aq, byltyr Parlament qabyldaǵan zańdardyń mańyzdylyǵy da erekshe atalyp ótti.
Jalpy, Prezıdentimizdiń barlyq bastamalary men reformalarynyń strategııalyq maqsaty – egemendigimizdi jáne ekonomıkamyzdy odan ári nyǵaıtý. Osyǵan baılanysty elimizdiń áleýmettik-ekonomıkalyq damýyna qatysty mańyzdy saýaldarǵa jaýap berilip, memlekettik saıasattyń negizgi baǵyttary aıqyndaldy, - dedi M. Áshimbaev Senattyń jalpy otyrysynda.
Senat tóraǵasy atalǵan suhbatta syrtqy saıasat pen halyqaralyq yntymaqtastyq máseleleri de nazardan tys qalmaǵanyn atap ótti.
- Sonymen qatar, Prezıdentimiz qoǵamda qyzý talqylanǵan ózekti máselelerdiń túıinin tarqatyp, olar boıynsha óz ustanymyn bildirdi. Mundaı ashyqtyq pen dıalog jáne azamattardyń talap-tilekterine jedel nazar aýdarý – «Zań men tártip» qaǵıdattaryna taban tiregen Ádiletti Qazaqstannyń jarqyn kórinisi ekeni sózsiz. Osy rette, Prezıdentimizdiń bastamasymen qolǵa alynǵan reformalardy zańnamalyq turǵydan qamtamasyz etý asa mańyzdy ekenin taǵy bir atap ótken jón.
Aldaǵy ýaqytta ekonomıkamyzdy damytýǵa jáne halyqtyń ál-aýqatyn arttyrýǵa arnalǵan birqatar mańyzdy zańdar qaralady. Olardy sapaly pysyqtap, ýaqtyly qabyldaýymyz qajet. Jalpy, Memleket basshysynyń Parlamentke artqan joǵary senimin aqtap, eldik múdde jolynda aıanbaı eńbek etýmiz kerek. Osy jolda bárimiz birlesip, nátıjeli jumys isteımiz dep senemin jáne aldaǵy qyzmetterińizge sáttilik pen tabys tileımin!», - dedi Máýlen Áshimbaev senatorlarǵa qarata aıtqan sózinde.
Eske salsaq, 2025 jyldyń 3 qańtar kúni «Ana tili» gazetinde Memleket basshysy Qasym-Jomart Toqaevtyń keń kólemdi suhbaty jaryq kóredi.