Ekonomıkamyz jańa jaǵdaıǵa beıimdelip, turaqty ósip keledi – Oljas Bektenov
«Biz buryn-sońdy bolmaǵan syn-qaterler men múmkindikter dáýirinde ómir súrip jatyrmyz. Búginde Qazaqstan ekonomıkasy jańa jaǵdaılarǵa sátti beıimdelip, turaqty ósýin jalǵastyrýda. Bıyl 9 aıda jalpy ishki ónim 4%-ǵa ósti, bul negizinen shıkizattyq emes sektordyń damýy esebinen qamtamasyz etildi. Eldiń fıskaldyq ornyqtylyǵy men makroekonomıkalyq turaqtylyǵyn Fitch, S&P jáne Moody's halyqaralyq reıtıngtik agenttikteri rastady», - dedi Oljas Bektenov elordada ótip jatqan «Jahandyq ınvestıtsııalyq úrdister: bolashaqty paıymdaý» atty forým barysynda.
Sondaı-aq, Premer-mınıstr jýyrda ınvestıtsııalyq saıasattyń jańartylǵan tujyrymdamasy qabyldanatynyn aıtty.
«Tujyrymdama jańa ınvestıtsııalyq tsıkldy iske qosýǵa jáne Qazaqstannyń 2029 jylǵa deıingi ulttyq damý josparynda belgilengen strategııalyq mindetterdi oryndaýǵa baǵyttalǵan. Sonymen qatar elimizdiń Salyq kodeksin jańartý boıynsha jumystar belsendi júrgizilýde, maqsat – salyq júıesi men ákimshilendirýdi jańǵyrtý. Bul rette, Úkimet ınvestıtsııalyq saıasatty iske asyrý úshin júıeli sharalar qabyldaýdy jalǵastyrady», - deıdi ol.
Buǵan deıin Úkimet jyl sońyna deıin energetıka jáne kommýnaldyq sharýashylyq ulttyq jobasyn bekitetini týraly habarlaǵan edik.
Aıta keteıik, búgin elordada qazaqstandyq jahandyq ınvestıtsııalar taqyrybynda forým ótip jatyr.