Ekonomıkalyq ósimdi qalpyna keltirý jospary 160-tan astam sharany qamtıdy - Smaıylov

NUR-SULTAN. QazAqparat - Qazaqstannyń jyl sońyna deıin ekonomıkalyq ósimdi qalpyna keltirý boıynsha keshendi jospary 160-tan astam sharany qamtıtyn 10 negizgi baǵyttan turady. Bul týraly QR Premer-Mınıstriniń birinshi orynbasary Álıhan Smaıylov aıtty, dep habarlaıdy QazAqparat tilshisi.

«2020 jyldyń sońyna deıingi ekonomıkalyq ósimdi qalpyna keltirý boıynsha keshendi jospar ázirleý úshin Úkimette aýqymdy jumys atqaryldy. Memlekettik organdardyń, Ulttyq banktiń, «Atameken» UKP jáne bıznes qaýymdastyq ókilderiniń qatysýymen 3 raýnd kezdesý ótkizildi. Jeke sektordyń 250-den astam usynysy muqııat qarastyryldy. Olar barynsha eskerildi», - dedi ol.

Birinshi vıtse-premerdiń aıtýynsha, birlesken talqylaýdan keıin keshendi jospar jobasyna naqty merzimder men qajetti qarjylandyrýdy aıqyndaı otyryp, salalyq jáne jalpy júıelik sharalar engizildi.

«Jalpy, keshendi jospar ekonomıkanyń ózin-ózi qamtamasyz etýin arttyrýǵa, ınvestıtsııa tartýǵa, naqty sektordy qoldaýǵa, servıstik ekonomıkany qalpyna keltirýge, sapaly tsıfrlandyrýǵa, sondaı-aq yntalandyrylatyn aqsha-kredıt saıasatyn júrgizýge baǵyttalǵan 160-tan astam sharany qamtıtyn 10 negizgi baǵyttan turady. Qalyptasqan sharalar ekonomıkany turaqtandyrýǵa, onyń odan ári sapaly jáne turaqty ósýin qamtamasyz etý úshin qajetti jaǵdaı jasaýǵa múmkindik beredi», - dedi Álıhan Smaıylov.