Ekonomıkalyq belsendi halyqtyń tek 20 paıyzy ǵana ózin baspanamen qamtamasyz ete alady - S. Nokın
Bul týraly búgin «Nur Otan» HDP Fraktsııasy janyndaǵy Óńirlik saıasat jáne maslıhattarmen jumys jasaý jónindegi keńestiń otyrysy barysynda Qurylys jáne turǵyn úı-kommýnaldyq sharýashylyǵy isteri agenttiginiń tóraǵasy Serik Nokın osylaı málim etti. Esterińizge sala keteıik, keńes otyrysynda «Qoljetimdi turǵyn úı - 2020» baǵdarlamasy jobasy talqylanǵan bolatyn.
«Qazaqstannyń turǵyn úı naryǵyndaǵy júrgizilgen zertteýlerimiz kórsetkenindeı, jańa turǵyn úı naryǵynda satyp alýdyń sharshy metri aǵymdaǵy jyldyń 1 aqpanyndaǵy jaǵdaı boıynsha 156 myń teńgeni qurady. Osyǵan oraı, 4 adamnan turatyn otbasy jańa turǵyn úıden 40 sharshy metrdi quraıtyn baspanany 15 jylǵa 15 paıyzdyq stavkamen ıpotekalyq zaem arqyly alatyn bolsa, onda bul otbasynyń aı saıynǵy tólemi 86 myń teńgeni quraıtyn bolady. Bul osyǵan deıin belgilengen qoljetimdilik lımıtinen 2,2 esege artyq», - deıdi agenttik tóraǵasy. Onyń aıtýynsha, qaıta satylym naryǵyndaǵy úıdiń baǵasy sharshy metri 113 myń teńgeni qurap otyr. Osy naryqtaǵy baspana satyp alý máselesin joǵaryda keltirilgen mysal retinde qarastyrsaq, onda 4 adamnan turatyn otbasynyń aı saıynǵy tólemi 63 myń teńgeni quraıdy eken. Atalǵan soma da qoljetimdilik lımıtinen 1,3 paıyzǵa artyq.
«Osylaısha, júrgizilgen zertteýler naryqtaǵy qalyptasqan jaǵdaıdyń ortasha tabysy bar halyqtyń belgili bir bóliginiń turǵyn úıge suranysyn qanaǵattandyra almaıtynyn kórsetip otyr. Al halyqtyń tabysyna keler bolsaq, búgingi tańda jurtshylyqtyń ortasha jalaqysy - 89 myń teńgeni qurap otyr. Sonymen qatar, elimizde halyqtyń ekonomıkalyq belsendi bóligi 8,4 mln. adamdy quraıdy. Zertteýler qorytyndysyna júginsek, ekonomıkalyq belsendi halyqtyń 20 paıyzy nemese 1,5 mln. adam ǵana qazir qalyptasyp otyrǵan naryqtyq jaǵdaıda ózin baspanamen qamtamasyz ete alady», - deıdi S. Nokın.