Ekonomıka ósimin qamtamasyz etý úshin qandaı sharalar qajet – QR UEM

NUR-SULTAN. QazAqparat – QR Ulttyq ekonomıka mınıstri Áset Erǵalıev ortalyq jáne jergilikti atqarýshy organdar nazar aýdarýy tıis is-sharalardy atady, dep habarlaıdy QazAqparat tilshisi.

«Ortalyq jáne jergilikti atqarýshy organdarǵa mynadaı sharalarǵa nazar aýdarý usynylyp otyr. Investıtsııalyq jobalar pýly sheńberinde jobalardy belsendi iske asyrý kerek. «Qarapaıym zattar ekonomıkasy», «Bıznestiń jol kartasy – 2025» jáne Ulttyq banktiń jeńildikpen kredıt berý baǵdarlamasy sheńberinde kásipkerlerdi qoldaý quraldarynyń tıimdi iske asyrylýyn qamtamasyz etý qajet», - dedi Ulttyq ekonomıka mınıstri búgingi Úkimet otyrysynda.

Sonymen birge, mınıstr memlekettik uıymdardyń, ulttyq kompanııalardyń jáne jer qoınaýyn paıdalanýshylardyń taýarlar men kórsetiletin qyzmetterdi satyp alýda qazaqstandyq qamtý úlesin ulǵaıtý sharalaryn kúsheıtýdi atap ótti.

«Eńbek naryǵyndaǵy turaqtylyqty qamtamasyz etý úshin «Eńbek» jáne «Jumyspen qamtý jol kartasy» baǵdarlamalary sheńberinde jobalardy iske asyrý kerek. Tutyný taýarlary baǵalarynyń serpindi monıtorıngin jáne tıisti turaqtandyrý sharalaryn qabyldaý kerek. Joǵaryda kórsetilgen sharalardy iske asyrý makroekonomıkalyq turaqtylyqty saqtaýǵa oń yqpal etedi», - deıdi Áset Erǵalıev.