Ekonomıka ósimi pandemııaǵa deıingi deńgeıge oraldy – Ulttyq bank
«Іshki ekonomıkadaǵy jaǵdaı oń bolyp otyr. Bıyl birinshi toqsanda jalpy ishki ónim 4,4%-ǵa ósti. Ekonomıkanyń 2021 jyly 4%-ǵa artyp, pandemııaǵa deıingi deńgeıge oralǵanyn atap ótken jón. 2022 jylǵy naýryzda taýar aınalymynyń ósýi jyldyq mánde 3,7%-ǵa deıin jedeldedi», - dedi Ǵ. Pirmatov Senat otyrysynda.
Onyń aıtýynsha, Qazaqstanda tutyný kóleminiń ósýi ınflıatsııaǵa qysym kórsetip otyr.
Inflıatsııa osy jylǵy sáýirde 13,2%-ǵa deıin jedeldedi. Ásirese azyq-túlik taýarlarynyń baǵasy qatty ósip, 17,9%-ǵa artty.
Azyq-túlikke jatpaıtyn taýarlar baǵasynyń ósimi 11,1%-ǵa, aqyly qyzmetter baǵasynyń ósimi 8,9%-ǵa deıin jedeldedi.
«Proınflıatsııalyq qysymnyń ósýinen Ulttyq bank dezınflıatsııalyq aqsha-kredıt saıasatyn júrgizip keledi. 2022 jylǵy 24 aqpanda Ulttyq bank geosaıası jaǵdaıdyń nasharlaýyna baılanysty qarjylyq jáne makroekonomıkalyq turaqtylyqty qamtamasyz etý úshin bazalyq stavkany 13,5%-ǵa deıin kóterdi. Bazalyq mólsherleme kóterilgen soń, aqpanda halyqtyń teńgedegi salymdary boıynsha Qazaqstannyń depozıtterge kepildik berý qory usynatyn shekti stavkalar da kóterildi», - dedi Ǵ. Pirmatov.
Sonymen qosa, Úkimetpen birlesip jeke tulǵalardyń teńgedegi depozıtteri boıynsha respýblıkalyq bıýdjet esebinen ótemaqy tóleýdi kózdeıtin Teńgedegi salymdardy qorǵaý baǵdarlamasy jarııalandy.
«Ulttyq Bank 25 sáýirde ekonomıkanyń, ishki jáne syrtqy suranystyń oń serpini kezinde jalǵasyp otyrǵan fıskaldyq yntalandyrý aıasynda bazalyq stavkany 14%-ǵa deıin kóterdi. Inflıatsııaǵa qarsy saıasatty kúsheıtý úshin Úkimet Ulttyq bankpen birlesip, bıylǵy aqpannan bastap 2022-2024 jyldarǵa arnalǵan Inflıatsııany baqylaý jáne tómendetý jónindegi jańartylǵan sharalar keshenin iske asyrýda», - dedi Ǵ. Pirmatov.
Buǵan deıin Ǵalymjan Pirmatov Qazaqstan úshin syrtqy ınflıatsııalyq jaǵdaı nelikten qolaısyz bolatynyn túsindirgen edi.