Ekonomıka mınıstrligi: Halyq tabysynyń satyp alý qabiletin qorǵaýǵa erekshe mán beriledi

NUR-SULTAN. QazAqparat Halyq tabysynyń satyp alý qabiletin qorǵaýǵa erekshe mán beriledi. Bul týraly Úkimet otyrysynda QR Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

Onyń atap ótýinshe, Halyqtyń tabysyn arttyrý baǵdarlamasyn iske asyrý aıasynda tabystyń satyp alý qabiletin qorǵaýǵa erekshe mán beriledi.

«Osy baǵytta mynadaı is-sharalar iske asyrylatyn bolady: ÁMAT tizbesine enbegen azyq-túlik taýarlarynyń óndirisin ulǵaıtý; ishki naryqtyń ımportyn negizgi azyq-túlik emes taýarlarmen almastyrý boıynsha is-sharalardy iske asyrý; halyqtyń problemaly qaryzdarymen jumys isteý boıynsha bankterdiń jeke josparlaryn qabyldaý», - dedi Álibek Qýantyrov.

Mınıstrdiń aıtýynsha, atalǵan is-sharalardy iske asyrý nátıjesinde 2025 jylǵa qaraı JІÓ-degi eńbekaqynyń úlesi – 34,5%; jalpy tabystaǵy eńbek qyzmetinen túsken tabystar úlesi – 76,2%; tabysy eń tómen kúnkóris deńgeıinen az halyqtyń úlesi – 5,2%; jumyssyzdyq deńgeıi 4,7% bolady. Búkil kezeń ishinde barlyǵy 2 mln astam adamǵa jumys orny qurylady.

Mınıstrdiń aıtýynsha, shaǵyn jáne orta bıznesti damytýdy yntalandyrý kásipkerlerdi qoldaýdyń óńirlik baǵdarlamasy aıasynda kredıtter/mıkronesıeler boıynsha jergilikti bıýdjetterden sýbsıdııalar berý, mono-, shaǵyn qalalar men aýyldyq eldi mekenderde jeńildikpen mıkrokredıt berýdi jáne jańa kepildik berý quralyn engizý arqyly júzege asyrylatyn bolady.