Ekonomıka mınıstri jańa ekonomıkalyq saıasattyń basymdylyǵyn atady- Jibek Joly

ASTANA. QazAqparat – Qazaqstannyń jańa ekonomıkalyq saıasaty shaǵyn jáne orta bıznes pen aýyldardy damytýǵa baǵyttalady. Bul týraly Ulttyq ekonomıka mınıstri Álibek Qýantyrov «Jibek Joly» telearnasyndaǵy jýrnalıst Erbolat Muhamedjannyń «JJ Talk» baǵdarlamasynda aıtty, dep habarlaıdy QazAqparat tilshisi.

«Álem bir orynda turmaıdy, únemi ózgeriste. Sondyqtan biz ekonomıkalyq saıasatty da soǵan saı ózgertip otyrýymyz kerek. Shaǵyn jáne orta bıznes mańyzdy sala. Sebebi damyǵan elderde shaǵyn jáne orta bıznestiń úlesi 50 paıyzdan asady. Bizde ol shamamen 37 paıyz. Endi bizdiń mindetimiz ony kóterý. Sodan keıin qarapaıym halyqtyń ál aýqatyn kóterý onyń ishinde, óńirilik teńgerimsizdikti joıý, aýyldardy damytý. Ózderińizge málim, Prezıdenttiń ınaýgýratsııadan keıingi birinshi Jarlyǵy aýyldardy damytý tujyrymdamasy boldy. Endi sol tujyrymdamany Ulttyq ekonomıka mınıstrligi ákimdiktermen birlesip pysyqtap jatyr», - dedi Álibek Qýantyrov.

Mınıstr pandemııanyń el ekonomıkasyna tıgizgen teris áserlerine toqtaldy. Álibek Qýantyrovtyń sózinshe, sońǵy 20 jyl ishinde Qazaqstan ekonomıkasyndaǵy eń iri teris ósim 2020 jyly baıqalǵan. Ol jyly pandemııa saldarynan -2,5 paıyzǵa quldyraǵan.