Ekonomıka áli kúnge deıin paıdaly qazbalarǵa táýeldi bolyp otyr - Prezıdent

ASTANA. QazAqparat – Memleket basshysy Úkimet pen Parlamentke geologııalyq barlaý jáne kenishterdi ıgerý isine ınvestıtsııa tartyp, salaǵa qatysty naqty sharalar ázirleýdi tapsyrdy, dep habarlaıdy QazAqparat tilshisi.

«Elimizdiń óndiristik áleýetin barynsha arttyrý mańyzdy. Qazaqstan ekonomıkasy áli kúnge deıin paıdaly qazbalarǵa táýeldi bolyp otyr, ıaǵnı el ekonomıkasynyń qurylymy qarapaıym. Shyn máninde, bizge qarqyndy damý úshin kúrdeli, ártarapty ekonomıkalyq qurylym qajet. Árıne, shıkizat naryǵyndaǵy álemdik básekede bizdiń óz artyqshylyǵymyz bar. Qazirgi jáne strategııalyq mindetterdi oryndaý úshin ony tıimdi paıdalaný qajet. Sondyqtan, osy salany odan ári damyta berý kerek», - dedi Qasym-Jomart Toqaev Parlamenttiń VIII shaqyrylymynyń birinshi sessııasynda.

«Biraq, jer qoınaýyn paıdalaný salasynda ondaǵan jyl boıy qordalanǵan problemalar az emes. Geologııalyq barlaý jumystarynyń oıdaǵydaı júrgizilmeýi taý-ken ónerkásibin órkendetýge kedergi keltirip otyr. Mıneraldy shıkizat bazasyn tolyqtyrý qarqyny báseńdep barady. Onyń ústine, qazir ıgerilip jatqan ken oryndarynyń qory sarqyla bastady», - deıdi Prezıdent.

Sondaı-aq, Memleket basshysy qazba baılyqty tıimdi jáne únemdi paıdalaný qajettigin aıtty.

«Ol úshin zańnamany jaqsartyp, rásimderdi jeńildetý kerek. Geologııalyq barlaý jáne kenishterdi ıgerý isine ınvestıtsııa tartý aıryqsha mańyzdy. Úkimet pen Parlament osy salaǵa qatysty naqty sharalar ázirleýge tıis», - dedi Qasym-Jomart Toqaev.