Ekologııany lastaǵany úshin tólenetin aıyppuldar óńir problemasyn sheshýge qashan jumsalady

NUR-SULTAN. QazAqparat – «ECOJER» qaýymdastyǵynyń atqarýshy dırektory Qýanysh Baltabaev qorshaǵan ortaǵa emıssııa úshin tólemderdi naqty maqsattarǵa jumsaý merzimin atady, dep habarlaıdy QazAqparat tilshisi.

«Ekologııalyq kodekstegi jańashyldyqtardyń taǵy biri – qorshaǵan ortaǵa emıssııa tólemderin tabıǵatty qorǵaý is-sharalaryna maqsatty túrde jumsaý. Bul másele óte kóp ári belsendi túrde talqylanyp, halyqaralyq sarapshylardyń, bıznes pen halyqtyń tarapynan kóp eskertý boldy. Emıssııa úshin tólemderdiń óńirlerdiń ekologııalyq problemalardy sheshýden basqa kez kelgen nársege jumsalatyndyǵy aıtyldy», - dedi Qýanysh Baltabaev «ECOJER» halyqaralyq kongresi barysynda.

Onyń atap ótýinshe, jańa kodekste bul normalar 2022 jyldan bastap kúshine enetindigi kózdelgen.

«Búginde jergilikti bıýdjetke shoǵyrlanatyn barlyq soma belgili bir óńirdiń ekologııalyq problemalaryn sheshýge jumsalatyn bolady. Eger el sheginde alyp qaraıtyn bolsaq, bul soma shamamen 80-90 mlrd teńgege jýyqtaıdy. Bul aıtarlyq qomaqty soma jáne ol árbir óńirdiń ekologııalyq problemasyn birtindep sheshýge múmkindik beredi», - dedi ol.