Ekologııalyq saýatty urpaq qalyptastyrýymyz kerek – Aıda Balaeva
«...Adam aýrýlarynyń kóptegen túrleri qorshaǵan ortadaǵy keleńsiz ózgeristermen tikeleı nemese janama túrde baılanysty ekeni anyqtalǵan. Biraq halyqtyń naýqastanýynyń ekologııalyq faktorlary men sebep-saldaryna ázirge elimizde jetkilikti deńgeıde nazar aýdarylmaı otyr. Ekologııalyq saýatsyzdyqty joıý -halyq arasynda júrgiziletin mańyzdy máselege aınalýy tıis. Tabıǵat pen qorshaǵan ortany qorǵaýdyń joldaryn uǵyndyrý, jalpyhalyqtyq ekologııalyq saýatty ashý, jastarǵa úzdiksiz bilim berý nátıjesinde ǵana sheshiledi, - dedi QR Aqparat jáne qoǵamdyq damý mınıstri Aıda Balaeva dóńgelek ústeldiń ashylýynda.
Mınıstr sońǵy ýaqytta adamnyń tabıǵatqa qatysty jabaıy áreketi kóptep baıqalǵanyn, onyń sońy apatqa ákep soǵatynyn atap ótti.
«Býrabaıdaǵy taý bolyp úıilgen qoqys, qyzǵylt kóldiń balshyǵy men tuzyn qazyp áketý, Almatydaǵy sırek kezdesetin lotos gúlderin julý – qazaqstandyqtardyń narazylyǵyn týdyrǵan qylyqtardyń bir parasy ǵana. Sondyqtan, búgin ózekti máselelerdi talqylap qana qoımaı, ekologııalyq aǵartý, jańa býyndy, jaýapty adamdardy tárbıeleý boıynsha egjeı-tegjeıli usynymdardy da tyńdaǵymyz keledi. Qazaqstannyń biregeı tabıǵı baılyǵy jyl saıyn adamdardyń yqpalymen azaıyp keledi. Olardyń kópshiligin qalpyna keltirý men qaıtarý múmkin emes. Sondyqtan memleket urpaqtar úshin tabıǵı baılyqty saqtaýǵa qajetti barlyq sharalardy qabyldaýǵa mindetti. Biraq bolashaq urpaqty da qorshaǵan ortaǵa uqyppen qaraý dástúri úzilmeıtindeı jáne urpaqtan-urpaqqa beriletindeı etip tárbıeleý qajet», - dedi Aıda Balaeva.