Ekologııalyq mádenıetti qalyptastyrýǵa qoǵam bolyp jumylýymyz kerek – mınıstr
Bul týraly ekologııalyq bilimge qatysty Facebook-tegi KUN.KZ ashyq medıa platformasynda ótken onlaın konferentsııada aıtyldy, dep habarlaıdy QazAqparat tilshisi.
«Prezıdent Qasym-Jomart Toqaev 10 shilde kúni Úkimettiń keńeıtilgen otyrysynda mektep baǵdarlamasyna «Balalardyń ekologııalyq bilimi» atty jańa pán engizý týraly tapsyrmasy halyq tarapynan, saıasatker, sarapshylar tarapynan qoldaý tapty. Bul konferentsııa jaqsy bastamany jalǵastyrýǵa sebep bolady dep oılaımyn. Ekologııalyq bilim mektepte ótetin pánmen shektelip qalmaı, qoǵam ókilderi, memlekettik organdar, sarapshylar, muǵalimder jáne ata-analar tarapynan keshendi jumys bolýy kerek. Óıtkeni ult tárbıesi, ekologııalyq turǵyda durys tárbıe otbasynan bastalady», - deıdi QR Ekologııa, geologııa jáne tabıǵı resýrstar mınıstri Maǵzum Myzaǵalıev.
Onyń aıtýynsha, bul bastamany azamattyq qoǵamnyń qoldaǵany qýantady, sebebi bul konferentsııaǵa halyqaralyq uıymdar da, ǵalymdar da, ekologtar da qatysyp otyr.
«Qazaqstannyń ekologııalyq máseleleri bárine belgili. Óndiristik lastaný, ıaǵnı atmosfera men sýdyń lastanýy jáne ekologııanyń turmystyq máseleleri de bar. Ekologııalyq tárbıeni qolǵa alýymyz kerek. Bir aı buryn stıhııalyq qoqys boıynsha baılanys jelisin iske qostyq. Bizge bul másele boıynsha apta saıyn júzden astam suraq keledi. Qazirgi kezde adamdar tabıǵat aıasyna shyqqan kezde óz qoqystaryn ǵana emes, aınalasyndaǵy qoqysty da tazalap ketedi. Bul sánge aınalyp keledi. Degenmen, Aqmola oblysyndaǵy Kóbeıtuzdaǵy jaǵdaı, Aqtaýda ıtbalyqtardy urý - ekologııalyq mádenıetimizdiń áli de bolsa, tómen ekendigin kórsetedi. Balalarymyzdy qorshaǵan ortany aıalaýǵa úıretýimiz kerek», - deıdi ol.
Eske sala ketsek, Prezıdent Qasym-Jomart Toqaev 10 shilde kúni Úkimettiń keńeıtilgen otyrysynda mektep baǵdarlamasyna «Balalardyń ekologııalyq bilimi» atty jańa pán engizýdi tapsyrǵan bolatyn.