Ekologııalyq kodekske túzetýler engizilmek

ASTANA. QazAqparat - QR Energetıka mınıstrligi Ekonomıkalyq yntymaqtastyq jáne damý uıymynyń usynymymen Ekologııalyq kodekske túzetýler ázirleıdi, dep habarlaıdy QazAqparat tilshisi.

«Jańa Ekologııalyq kodekste qorshaǵan ortaǵa áserdi baǵalaý boıynsha taraýlardy qaıta qarastyrýǵa nıettimiz. Halyqaralyq sarapshylardyń usynymdaryn eskere otyryp, bul taraýlardy kúsheıtemiz», - dep atap ótti QR Energetıka vıtse-mınıstri Sábıt Nurlybaı Qazaqstandaǵy ekologııalyq baǵalaý júıesin jetildirýge arnalǵan dóńgelek ústelde.

Odan bólek, jańartylǵan Ekologııalyq kodekste «Strategııalyq ekologııalyq baǵalaý» jáne «Transshekaralyq rásimder» atty jańa taraýlar qarastyrylady jáne ekologııalyq baǵalaý júıesi salasyndaǵy qosymsha jáne sektorlyq zańnamalar ózgertiledi.

Vıtse-mınıstrdiń aıtýynsha, zańnamaǵa usynylǵan ózgertýler ekologııalyq baǵalaýdy anaǵurlym tıimdi jáne ashyq etedi, ekologııalyq saldardyń aldyn alady jáne sharýashylyq qytszmet sýbektilerine artylǵan júktemeni azaıtýǵa múmkindik beredi.

Otyrys barysynda QR otyn-energetıkalyq keshenin damytýdyń 2030 jylǵa deıingi tujyrymdamasyna qatysty Strategııalyq ekologııalyq baǵalaý pılottyq jobalarynyń qorytyndysy baıandaldy. Ony ázirleýge strategııalyq baǵalaý, energetıka, bıoalýantúrlilik, klımattyń ózgerýi jáne densaýlyq saqtaý salasyndaǵy halyqaralyq jáne ulttyq sarapshylar tartylǵan.

 «Qazaqstannyń «jasyl» ekonomıkaǵa kezeń-kezeńimen kóshýi aıasynda BUU EEK-niń Strategııalyq ekologııalyq baǵalaý boıynsha hattamasyna qosylý qajettigin qarastyrý mańyzdy bolyp qala beredi», - dedi S. Nurlybaı.