Ekologııalyq taza kólik: Mańǵystaýda metanmen júretin jańa avtobýstar paıda boldy

<p>Mańǵystaý oblysynda óńir ekologııasyna oń yqpal etetin avtobýstardyń jańa býyny paıda boldy. Aqtaýda qalalyq baǵyt boıynsha jolaýshylardy tasymaldaıtyn 30 jańa avtobýs óz jumysyn bastady, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Sonymen qatar jańa avtobýstar «Aqtaý – Áýejaı» baǵytynda qatynaıdy. Jaqyn arada metanmen júretin taǵy 90 avtobýsty paıdalanýǵa berý josparlanyp otyr. Bul týraly OKQ brıfınginde Nurlan Noǵaev habarlady.

Jańa kólik (avtobýstar) jergilikti bıýdjetten jáne ónerkásipti damytý qory AQ qarajaty esebinen satyp alyndy. Jergilikti bıýdjet esebinen -1.1 mlrd teńge, qalǵan somany ónerkásipti damytý qory AQ qarjylandyrdy. Barlyq avtobýs aýany baptaý júıesimen, beınebaqylaý kameralarymen jáne múmkindigi shekteýli jandarǵa arnalǵan pandýspen jabdyqtalǵan. Jalpy joba 9,2 mıllıard teńgege baǵalanady.

Jańa avtobýs ınfraqurylymynyń mańyzdy bólikteri — arnaıy dıspetcherlik júıe qoǵamdyq kólik baǵyttarynyń qozǵalysyn, al kameralar avtobýs salonyn baqylaýǵa múmkindik beredi. Sondaı-aq avtobýstardy otynmen qamtamasyz etý úshin oblysta alǵashqy ret erekshe gaz quıý stantsııasy — metan stantsııasy paıdalanýǵa berildi.

«Jańa avtobýstarda gaz motorly qozǵaltqyshtardy paıdalaný aýaǵa taraıtyn zııandy qaldyqtar kólemin azaıtýǵa jáne sýbsıdııalaý salasynda bıýdjet qarajatyn utymdy paıdalanýǵa yqpal etedi», - dedi Nurlan Noǵaev.

Óńir basshysy negizgi maqsat Mańǵystaý oblysynda jolaýshylar kóliginiń qaýipsiz, jaıly jáne sapaly qyzmetterin qamtamasyz etý ekenin atap ótti. Ol sondaı-aq aımaqtaǵy suıytylǵan gazdy tutynýdyń joǵary kórsetkishterin atap ótip, metandy paıdalaný suıytylǵan gazǵa júktemeni tómendetetinine senim bildirdi.

«Bizdiń maqsatymyz – Mańǵystaý oblysynda jolaýshylar kóliginiń qaýipsiz, jaıly jáne sapaly qyzmetterin qamtamasyz etý, avtobýstardy kútý ýaqytyn qysqartý jáne jolaýshylar tasymaly naryǵyna jańa sapaly avtobýstar usyný», - dedi Mańǵystaý oblysynyń ákimi.