Ekologııa zańnamasyn buzǵandarǵa 32 mlrd teńge aıyppul salyndy – Serik Shápkenov

<p>ASTANA. KAZINFORM &ndash; Atyraý oblysynyń ákimi Serik Shápkenov qorshaǵan ortany qorǵaý sharalaryna toqtalyp, óńirdiń qazirgi ekologııalyq jaǵdaıy týraly aıtty.</p>

— Bıyl oblystyq ekologııa departamenti óńirdegi ekologııalyq zańnamanyń saqtalýyn baqylaý maqsatynda 27 tekserý júrgizip, nátıjesinde 149 ákimshilik is qozǵaldy. Ekologııalyq zańnamany buzǵandarǵa 32 mlrd teńge kóleminde aıyppul salyndy. Aýaǵa taraıtyn gaz, basqa da zııandy qaldyqtar mólsherin azaıtý maqsatynda aımaqta ormandy kóbeıtý men eldi mekenderdi kógaldandyrýdyń naqty jospary bekitildi, — dedi Serik Shápkenov oblystyń bıylǵy áleýmettik-ekonomıkalyq damýy týraly esep bere turyp.

Ákim usynǵan statıstıkaǵa súıensek, bıyl orman alqabyna 965,7 myń kóshet otyrǵyzyldy. Sondaı-aq qala jáne eldi mekender ishinde 52,3 ga jerge 78,9 myń tal egildi.

— Aımaqta aýaǵa shyǵarylatyn emıssııa kólemi de azaıyp keledi. Jylyna 150 myń tonna qoqys suryptaıtyn keshen iske qosyldy. Odan suryptalǵan karton qaǵazdy qaıta óńdeıtin tseh jumysyn bastady, — dep tolyqtyrdy óńir basshysy.

Aıta ketsek, respýblıkalyq jalpy ishki ónimniń 12,7 paıyzy Atyraý oblysynyń úlesinde. 

Buǵan deıin Atyraý oblysynda aýdan jáne aýylǵa baryp jumys isteıtin dáriger mamandarǵa bir rettik qarjylaı kómek kórsetiletinin habarlaǵan edik.