Ekologııa vıtse-mınıstri Maqtaaral aýdanyna jumys saparymen keldi

MAQTAARAL. QazAqparat – Túrkistan oblysy, Maqtaaral aýdanyna elimizdiń QR Ekologııa, geologııa jáne tabıǵı resýrstardy paıdalaný vıtse-mınıstri Sergeı Gromov pen atalmysh mınıstrliktiń Sý resýrstary komıtetiniń tóraǵasy Arman Turlybek jumys saparymen keldi. Olar shalǵaı aýdandaǵy jalpy quny 39 mıllıard teńgeni quraıtyn PÝID-2 jobasynyń jumys barysymen tanysty, dep habarlaıdy QazAqparat tilshisi.

Maqtaaral aýdanynda PÝID-2 jobasy jalpy 39796 gektar aýmaqty qamtyp, 3 kezeń boıynsha júrgizilýde. Joba aıasynda 223 kanal, 208 sý qashyrtqy júıesi, 149 tik drenaj kúrdeli jóndeýden ótip, qaıta qalpyna keltiriletin bolady. Jobanyń І kezeńi boıynsha ázerbaıjandyq «Akelık Grýp» kompanııasy qurylys jumystaryn júrgizip jatyr. Kompanııanyń dırektory Ilham Mamedov pen joba jetekshisi Pavel Grasmık jalpy qurylys jumystary 30 aıǵa josparlanǵanyn atap ótti.

Alǵashqy kezeń aıasynda Eńbekshi jáne Jańajol aýyldyq okrýgterine qarasty uzyndyǵy 147,18 shaqyrymdy quraıtyn K-11, K-13, K-13A kanaldary tarmaqtarymen birge, 49 dana tik drenaj ben uzyndyǵy 191,6 shaqyrymdy quraıtyn sý qashyrtqy júıeleri kúrdeli jóndeýden ótetin bolady. Sondaı-aq, aýdan ortalyǵy Myrzakent kentindegi 4 dana tik drenajdaryn jóndeý de qamtylmaqshy. Joba júzege asqanda Eńbekshi aýyldyq okrýginiń 5350 gektary, Jańajol aýyldyq okrýginiń 2650 gektary jáne Myrzakent kentiniń 8000 gektar aýmaǵy jerasty sýlarynan tazaratyn bolady.

Qazirgi tańda jalpy uzyndyǵy 7,2 shaqyrymdy quraıtyn birneshe kanalda qurylys jumystary júrgizilip, tolyqtaı aıaqtalǵan. Sondaı-aq, dál osy kezeń aıasynda 44 birlikti quraıtyn jelilik qurylǵylar ornatylyp, 16 dana baqylaý uńǵymalaryna da qurylys jumystary jasalǵan.

«Akelık Grýp» kompanııasynyń basshysy qazirgi ýaqytta uzyndyǵy 10,78 shaqyrymdy quraıtyn 6 kanalda qurylys jumystary júrgizilip jatqanyn aıtty. Iirjar aýyldyq okrýginiń 7581 gektary, Birlik aýyldyq okrýginiń 4575 gektary jáne Jambyl aýyldyq okrýginiń 4291 gektar alqabyn jer asty sýlarynan tazartý ІІ kezeń boıynsha iske asyrylýda. Ol úshin ırandyq «Týnnel Saad Arıana» kompanııasy qurylys jumystaryn júrgizýde. Kompanııanyń dırektory Babak Novrýzı men joba jetekshisi Golamı Behman jobany iske asyrý 36 aıǵa josparlanǵanyn tilge tıek etip, vıtse-mınıstr Sergeı Gromovqa jumys barysy jóninde esep berdi.

Jalpy ІІ kezeńde 16447 gektar aýmaqtaǵy uzyndyǵy 337,35 shaqyrymdy quraıtyn K-16B, K-18, K-18A kanaldary tarmaqtarymen birge, 100 dana tik drenaj jáne 262 shaqyrymdy quraıtyn sý qashyrtqy júıeleri kúrdelý jóndeýden ótetin bolady. Aıta keteıik, PÝID-2 jobasynyń 3 birdeı kezeńimen tanysyp shyqqan Sergeı Gromov jobaǵa jergilikti jerden jumysshylardy kóptep tartý jáne joǵary jalaqy berilý kerektigin atap ótti. Sondaı-aq, qurylys jumystarynyń sapaly júrgizilýin únemi qadaǵalap turý úshin aýdan ákimi Baqyt Asanovqa tapsyrma berdi.