Ekologııa, Tótenshe jaǵdaılar, Mádenıet jáne Syrtqy ister mınıstrlikteri bıýdjet qarajatyn ıgere almady

ASTANA. QazAqparat – QR Premer-Mınıstriniń orynbasary – Qarjy mınıstri Erulan Jamaýbaev bıýdjet qarajatyn tıimdi ıgere almaǵan organdar men óńirlerdi atady, dep habarlaıdy QazAqparat tilshisi.

«Jergilikti bıýdjetterdiń kiristeri 121,7%-ke atqaryldy jáne 3,1 trln teńgeni qurady. Jospar 552 mlrd teńgege, onyń ishinde salyqtar boıynsha 504 mlrd teńgege asyra oryndaldy. Kirister boıynsha josparlar barlyq óńirlerde asyra oryndaldy», - dedi mınıstr Úkimettiń búgingi otyrysynda.

Onyń aıtýynsha, memlekettik bıýdjet shyǵystary 99,3%-ke, respýblıkalyq bıýdjet shyǵystary – 99,4%-ke, jergilikti bıýdjetterdiń shyǵystary 99,5%-ke atqaryldy.

«Respýblıkalyq bıýdjet boıynsha somasy 11 trln teńgege shyǵystar júrgizildi. Munda 62 mlrd teńge atqarylmaı qaldy, onyń ishinde 13 mlrd teńge – únemdeý bolsa, 49 mlrd teńge ıgerilmegen. Igerilmeýdiń anaǵurlym iri somalary Tótenshe jaǵdaılar, Ekologııa jáne tabıǵı resýrstar, Mádenıet jáne sport jáne Syrtqy ister mınıstrlikterinde qalyptasty. Igerilmeýdiń negizgi sebepteri: konkýrstyq rásimderdi uzaq ótkizý; shot-faktýralar, atqarylǵan jumys aktileriniń ýaqytyly ótkizilmeýi; esepti aıda qarajatty jumsaý qajettiliginiń bolmaýy», - dedi E. Jamaýbaev.

Jergilikti bıýdjetterdiń shyǵystary 5,8 trln teńgeni qurady. Onda 28 mlrd teńge atqarylmaı qalǵan.

«Bıyl óńirlerge 2 trln teńgege jýyq nysanaly transfertter kózdelgen. Olarǵa 1 shildege 755 mlrd teńge bólingen. Onyń 99% ıgerilgen. Igerilmeı qalǵan 8 mlrd teńge Aqtóbe, Qaraǵandy, Aqmola jáne Atyraý oblystarynda qalyptasty», - dep túsindirdi Qarjy mınıstri.