Ekologııa mınıstrligin sotqa bergen Qashaǵan operatorynyń talaby ishinara qanaǵattandyryldy

ASTANA. QazAqparat – Ekologtar Qashaǵan ken ornynyń operatoryna ekologııalyq talaptardy saqtamaǵany úshin aıyppul salǵan bolatyn. Kompanııa bul sheshimmen kelispeı, Ekologııa jáne tabıǵı resýrstar mınıstrligin sotqa berdi. Ótken aptada sot sheshimi shyqty, dep habarlaıdy QazAqparat tilshisi Astana sotynyń baspasóz qyzmetine silteme jasap.

«Іs 2023 jyldyń 14 maýsymynda qaraldy. Sot sheshimimen talap ishinara qanaǵattandyryldy. Sot mınıstrlik sheshimin zańsyz dep tanyp, 10 buzýshylyqtyń 3-in joıý týraly buıryqtyń kúshin joıdy», - degen jaýap aldyq elorda sotynan.

Eske sala keteıik, bıyl naýryzda Ekologııa mınıstrligi North Caspian Operating Company kompanııasyn ekologııalyq talaptardy buzǵany úshin aıyppul salýdy talap etip, sotqa júgingenin habarlaǵan edik.

Odan bólek, Bloomberg basylymy QR Ekologııa jáne tabıǵı resýrstar mınıstrliginiń North Caspian Operating Company kompanııasyn ekologııalyq talaptardy buzǵany úshin $5,1 mlrd kóleminde aıyppul salýdy talap etip, sotqa júgingenin jazǵan.

Bıyl 6 naýryzda Atyraý oblysy boıynsha ekologııa departamenti kúkirtti zańsyz saqtaý faktisi boıynsha North Caspian Operating Company kompanııasynyń qyzmetine tekserý júrgizgeni belgili boldy.

Keıin Qashaǵan munaı ken ornynyń operatory North Caspian Operating Company Ekologııa jáne tabıǵı resýrstar mınıstrliginiń kúkirt shyǵaryndylaryn shekten tys asyrǵany týraly sheshimimen kelispeıtini aıtyldy.