Ekologııa mınıstrligi jaraly ıtbalyqtyń vıdeosyna qatysty shara qabyldaýda

NUR-SULTAN. QazAqparat – Ekologııa, geologııa jáne tabıǵı resýrstar mınıstrligi kómek kórsetý úshin Aqtaý portyndaǵy jaraly ıtbalyq izdestirip jatyr. Birer kún buryn áleýmettik jelilerde jaraly ıtbalyqtyń vıdeosy tarap ketken bolatyn, dep habarlaıdy QazAqparat.

«Dostar, áleýmettik jelidegi jaraly ıtbalyq týraly beınejarııalanymdy naqtylaǵym keledi. Mańǵystaý oblystyq aýmaqtyq orman sharýashylyǵy jáne janýarlar dúnıesi ınspektsııasy vıdeony Aqtaý teńiz portynyń qaýipsizdik qyzmeti túsirgenin anyqtady. Beınetúsirilimde ıtbalyqtyń arqasynda kemeniń nemese katerdiń burandasymen urǵan úlken jaraqat bar ekeni kórinedi. Qazirgi ýaqytta ınspektsııa qyzmetkerleri janýarǵa kómek kórsetý úshin izdestirip jatyr. Aqtaýda ıtbalyqtardy zertteıtin jáne qalpyna keltiretin ortalyq bar ekenin aıtqym keledi. Jaraly ne aýrý ıtbalyqty kórgen jaǵdaıda, ortalyq ony qutqarý, qajetti kómek kórsetý úshin jedel top attandyrady», - dep habarlady mınıstrliktiń baspasóz qyzmetinen.

Osy beınetúsirilimdi jasaǵan adamdarmen áńgime ótkizilip, aldaǵy ýaqytta mundaı jaǵdaı qaıtalana qalsa, aýmaqtyq ınspektsııaǵa nemese joǵarydaǵy ortalyqqa júginý qajett.

«Mundaı jaǵdaıda dereý mınıstrliktiń [phone] nómirli jedel jelisine habarlasý kerek. Bul tez qımyldap, janýarlarǵa jedel kómek kórsetýge múmkindik beredi», - delingen habarlamada.