Ekologııa mınıstrligi óskemendik oqýshynyń vıdeosyna jaýap berdi
«Maǵan Óskemende túsirilgen beınejazbany túsindirýdi surap, habarlasqandar boldy. Bul qaladaǵy ekologııalyq jaǵdaıdyń asa máz emestigi bizge málim. Munyń bári eń aldymen iri ónerkásip óndirisiniń, gazben lastanýǵa baılanysty másele. Mınıstrlik ónerkásip kásiporny shyǵaryndylaryn azaıtý úshin josparly jumys júrgizip jatyr. Al jańa Ekologııalyq kodeks qabyldanǵan soń barlyq kompanııalar qorshaǵan ortaǵa zardapty azaıtý úshin óz óndirisinde eń ozyq qoljetimdi tehnologııalardy ornatýǵa mindetti. Qorshaǵan ortanyń emıssııa tólemi de ósedi», - dep túsindirdi Ekologııa mınıstrliginiń baspasóz hatshysy Samal Ibraeva.
Onyń aıtýynsha, jańa Ekologııalyq kodeks boıynsha kompanııalarǵa aıyppulmen qutyla salý ońaıǵa túspeıdi.
«Osy aralyqta Qazaqstannyń Ekologııa, geologııa jáne tabıǵı resýrstar mınıstri Maǵzum Myrzaǵalıevtiń tapsyrmasy boıynsha Óskemenge Ekologııalyq retteý jáne baqylaý komıtetiniń tóraǵasy Zulfyhar Joldasov baryp, sol jerde azamattardy qabyldap, mán-jaıdy anyqtaıdy. Sizderge jaǵdaıdy habarlap otyramyz», - deıdi ol.
Aıta ketsek, osydan birneshe kún buryn óskemendik oqýshy qala shetindegi qyrǵa shyǵyp, Óskemendi kómkergen kók tútinniń vıdeosyn jarııalaǵan bolatyn. Oqýshy vıdeoda «qala shetine taza aýamen tynystaý úshin» shyqqanyn aıta kele shahardaǵy kók tútinniń ishinen shahardaǵy alyp murjalar ǵana kórinip turǵanyn baıandaıdy.