Ekologııa mınıstrligi qoqys máselesi boıynsha júıeli jumys bastady

NUR-SULTAN. QazAqparat - Ekologııa, geologııa jáne tabıǵı resýrstar mınıstrliginiń ókilderi Nur-Sultan qalasyna jaqyn jerdegi stıhııalyq qoqystarǵa reıd júrgizdi. Mundaı reıdter búkil elde ótkizilmek, dep habarlaıdy QazAqparat tilshisi mınıstrliktiń baspasóz qyzmetine silteme jasap.

Mınıstrlikke qarasty ekologııa, geologııa jáne tabıǵı resýrstar komıtetiniń tóraǵasy Zulfyhar Joldasov Memleket basshysynyń stıhııalyq qoqys úıindilerin joıý týraly tapsyrmasyn oryndaýdyń mańyzyn atap ótti.

Eske salsaq, bıylǵy 10 shildede úkimettiń keńeıtilgen otyrysynda QR Prezıdenti Qasym-Jomart Toqaev kún ótken saıyn kúrdelenip otyrǵan ekologııalyq problemalardy sheshýdiń ózektiligin jetkizgen bolatyn.

«Jyl saıyn 5 mln tonnadan asa qatty turmystyq qaldyqtar shyǵarylady. Olardy óńdeý kólemi - elimiz boıynsha tek 15% ǵana. Bul - jetkiliksiz. Úkimetke jedel túrde zańnamalyq baza ázirlep, «Waste to energy» tehnologııasyn engizý úshin qolaıly ınvestıtsııalyq jaǵdaı týǵyzý qajet, - dep málimdedi Qasym-Jomart Toqaev.

Al ótken aptada ekologııa mınıstrligi ár óńirdegi stıhııalyq úıindiler týraly azamattardan aqparat jınaý úshin jedel jelini iske qosqan bolatyn. Búginde 250-den asa shaǵym kelip túsken. Shaǵymnyń kóbi - Almaty oblysy (40 shaǵym), Almaty qalasy (apta ishinde - 18 habarlama), Aqtóbe, Aqmola jáne Shyǵys Qazaqstan oblystaryndaǵy qoqys úıindileri týraly. Úıilgen qoqys týraly eń kóp habar bergen - Qaraǵandy (15) jáne Aqtóbe (14) oblysynyń, sondaı-aq Almaty qalasynyń (11) turǵyndary.

Ekologııa mınıstrligi habarlaǵandaı, jyl basynan beri tapsyrys boıynsha Qazaqstannyń iri qalalary men onyń 50 shaqyrym aýmaǵyndaǵy óndiris jáne tutyný qaldyqtaryna ǵaryshtyq monıtorıng júrgizilgen. Osynyń nátıjesinde búkil el boıynsha 7 myńnan astam zańsyz qoqys oryndary anyqtaldy.

Ǵarysh monıtorıngi kezinde mınıstrlik óńirlerdegi úıindilerdi joıýdyń jańa kestesin jasap, bekitý úshin ákimdikterge joldady. Búginde onyń 18-i joıyldy.

Jedel jeli nómiri: [phone].