Ekologııa mınıstrligi kıikter popýlıatsııasyn saqtaýǵa shaqyrady

NUR-SULTAN. QazAqparat - Ekologııa, geologııa jáne tabıǵı resýrstar mınıstrligi kıikter popýlıatsııasyn saqtaýǵa shaqyrady, dep habarlaıdy QazAqparat vedomstvonyń Telegram paraqshasyna silteme jasap.

«Búgin - halyqaralyq kıik kúni. Kıikterdiń dúnıejúzilik taralymynyń 90% - dan astamy Qazaqstanda mekendeıdi. Olardyń - Betpaqdala, Oral jáne Ústirt sekildi úsh popýlıatsııasy bar. Kıiktiń qazirgi jaıylym aımaǵy elimizdegi on ákimshilik oblystyń aýmaǵyn qamtyp, tipti Ózbekstan men Reseı Federatsııasynyń kórshiles oblystaryna da taralady», delingen habarlamada.

Mınıstrliktiń málimetinshe, qazirgi tańda janýarlardyń sırek kezdesetin jáne joıylyp bara jatqan túrleri men kıikti qorǵaý, ósimin molaıtýmen Orman sharýashylyǵy jáne janýarlar dúnıesi komıtetine qarasty «Ohotzooprom «ÓB» RMQK aınalysady.
«Aıta keteıik, elimizdegi kıikterdiń sany ár jyldary ózgerip otyrdy. Máselen, HH ǵasyrda kıikterdiń eń kóp sany 1970-shi jyldary - 510 myńnan 1 mln 200 myńǵa deıin, eń az sany – 1990-shy jyldary – 148-den 976 myńǵa deıin tirkeldi. Sodan keıin 10 jyl boıy, negizinen brakonerliktiń nátıjesinde turaqty tómendeý baıqaldy. HHІ ǵasyrdyń basynda olardyń sany edáýir tómendep, 2003 jyly 21,1 myńǵa jetti», delingen habarlamada.
Qazirgi ýaqytta QR Ekologııa, geologııa jáne tabıǵı resýrstar mınıstrligi, Ohotzooprom, Zoologııa ınstıtýty qabyldaǵan qorǵaý sharalarynyń arqasynda kıikterdiń sany qalpyna kele bastady. 2019 jylǵy málimet boıynsha kıik sany 334 400 boldy. 2020 jyly pandemııaǵa baılanysty esep júrgizilgen joq. Qazir sanaq qaıta jandandy jáne nátıjesi jyl sońynda belgili bolady.
«Kıikterdi qorǵaý úshin Komıtet, QR Іshki ister mınıstrligi jáne Ulttyq qaýipsizdik komıteti jyl saıyn brakonerlikpen kúres boıynsha «Kıik» tabıǵatty qorǵaý aktsııasyn ótkizedi. Qazaqstanda kıikti, olardyń bóligi men derıvatyn ǵylymı maqsattarda paıdalanýdan basqa, paıdalanýǵa tyıym salý 2023 jylǵa deıin uzartyldy», delingen habarlamada.
Esterińizge sala keteıik, Qazaqstan Prezıdenti Qasym-Jomart Toqaev kıikterdi atqany úshin jazany qatańdatý qajettigin aıtty. Elimizde brakonerlik úshin qylmystyq zańnama kúsheıtildi. Máselen, Qylmystyq kodekstiń 339-baby kıikti, onyń bólikterin nemese derıvattaryn, onyń ishinde kıik múıizderin zańsyz oljalaǵany, ıemdengeni, saqtaǵany, ótkizgeni, ákelgeni, áketkeni, jibergeni, tasymaldaǵany nemese joıǵany úshin múlki tárkilenip, 3 jyldan 5 jylǵa deıin bas bostandyǵyn shekteýdi ne odan aıyrýdy kózdeıtin jańa bólikpen tolyqtyryldy.