Ekologııa mınıstrligi: Іlede geologııalyq barlaý ózenniń ekojúıesine keri áser etedi

NUR-SULTAN. QazAqparat - QR Ekologııa, geologııa jáne tabıǵı resýrstar mınıstrligi Sý resýrstary komıtetiniń mamandary «Taý-Ken Samuryq» ulttyq taý-ken kompanııasy» AQ-nyń Almaty oblysynyń Balqash aýdanyndaǵy jobasyna teris baǵa berdi, dep habarlaıdy QazAqparat mınıstrliktiń baspasóz qyzmetine slteme jasap

Kompanııa geologııalyq barlaý úshin qarastyryp jatqan aýmaqtar respýblıkalyq mańyzy bar tabıǵı qoryqshanyń shekarasynda ornalasqan.

«Erekshe qorǵalatyn tabıǵı aýmaqtar týraly» zańǵa sáıkes, keshendi memlekettik tabıǵı qoryqshalarda tabıǵı keshenderge, ósimdikter men janýarlardyń ıntrodýktsııasyna qaýip tóndiretin sharýashylyq qyzmet júrgizýge tyıym salynady. Atalǵan zań normalarynda «jarylysqa, zııandy tehnologııa men tehnıkany, jerdi jyrtýǵa» tyıym salynatyny da jazylǵan.

«Osyǵan baılanysty Ekologııa mınıstrliginiń Sý resýrstary komıtetiniń mamandary qoryqsha aýmaǵynda geologııalyq barlaý júrgizý durys emes dep sanaıdy. Mınıstrlik sarapshylarynyń baǵalaýynsha, Іle ózeniniń saǵasy geologııalyq barlaý jumysyn júrgizý jerústi jáne jerasty sýlaryna, sonymen birge Іleniń ekojúıesine teris áserin tıgizedi.

Іle ózeni Balqash kóline quıar tusta aýmaǵy 8 myń sharshy shaqyrymdy quraıtyn atyraýǵa (delta) aınalady. Elimizdegi saqtalyp qalǵan jalǵyz delta kólmen gıdravlıkalyq baılanysta jáne ol ekojúıedegi ekologııalyq tepe-teńdikti ustap turýda tabıǵı retteýshi rólin atqarady.

Balqash shuńǵymasyndaǵy ıntensıvti sharýashylyq qyzmet kólge qaýip tóndirip, keri saldarǵa aparyp soqtyrýy múmkin», delingen habarlamada.

Mınıstrlik mamandary, optımaldy gıdrologııalyq rejımdi ustap turý úshin delta ýchaskesinde ondaǵy qalyptasqan jaǵdaıdy ózgertetin ırrıgatsııalyq jumystardy toqtatý kerek dep sanaıdy.