Ekologııa mınıstrligi balyq ónimderin baqylaıtyn aqparattyq júıe engizbek

NUR-SULTAN. QazAqparat - Qazaqstannyń Ekologııa, geologııa jəne tabıǵı resýrstar mınıstrligi balyq ónimderiniń kóleńkeli aınalymyn azaıtý úshin arnaıy aqparattyq júıe engizýdi josparlap otyr. Bul týraly Atyraý qalasynda Qazaqstan Premer-Mınıstriniń tóraǵalyǵymen ótken balyq sharýashylyǵyn damytý jónindegi keńeste Ekologııa, geologııa jəne tabıǵı resýrstar mınıstri Maǵzum Myrzaǵalıev aıtty, dep habarlaıdy QazAqparat tilshisi vedomstvonyń Telegram-yna silteme jasap.

«Mınıstrlik óziniń aldyna mynadaı mindetter qoıyp otyr. Birinshiden, túrli məlimetter boıynsha, 100-190 myń tonna bolatyn kóleńkeli aınalymdy azaıtý úshin balyq ónimderiniń aqparattyq baqylaný júıesin engizý qajet», - dedi M.Myrzaǵalıev.

Mınıstrdiń aıtýynsha, balyq ónimin kóleńkeden shyǵarý salyq kólemin 40 mlrd teńgege deıin arttyrady. Bul júıeni engizý Tsıfrlyq damý, ınnovatsııalar jəne aeroǵarysh ónerkəsibi mınıstrligimen birge iske asyrylady.

Ekologııa mınıstrligi basshysy, sonymen qatar, brakonerlikpen kúrestiń tıimdiligin arttyrý məselesin kóterdi.

Onyń pikirinshe, brakonerliktiń aýqymyn azaıtýǵa edəýir yqpal etetin osy qylmys úshin jaýapkershilikti qatańdatqan qylmystyq zańnamaǵa engizilgen túzetýlermen birge zamanaýı tehnıkalyq quraldardy da paıdalaný qajet.