Ekologııa mınıstrligi ArselorMıttalǵa tekseris júrgizetin kompanııany tańdap jatyr

ASTANA. QazAqparat – Ekologııa jáne tabıǵı resýrstar mınıstrligi «ArselorMıttal» kompanııasynyń qyzmetine tekseristi bastaıdy. Búginde onymen aınalysatyn kompanııa tańdalyp jatyr. Bul týraly atalǵan vedomstvonyń basshysy Zúlfııa Súleımenova málim etti, dep habarlaıdy QazAqparat tilshisi.

«Tekserýdi júzege asyratyn kompanııany tańdaımyz. Bizge birneshe usynys kelip tústi, olardy muqııat qarastyramyz. Óıtkeni, tekseris sapaly júrgizilýi kerek. Osy aptada kompanııany tańdap, sodan soń «ArselorMıttal» qyzmetin tekserýge qatysty materıaldardy ázirlep jiberemiz. Tekseris quny kompanııanyń baǵa usynysyna qaraı anyqtalady. Ázirge bıýdjet jaǵy naqtylanǵan joq. Soma tekseristi júrgizetin kompanııa ótkizetin is-sharaǵa baılanysty belgilenedi», - dedi Zúlfııa Súleımenova Úkimet otyrysynan keıin BAQ ókilderiniń saýalyna jaýap bere turyp.

Eske salaıyq, buǵan deıin «Arselor Mıttal Temirtaý» metallýrgııalyq kesheni bıyl qorshaǵan ortaǵa emıssııa shyǵarýǵa ruqsat alǵanyn habarlaǵan edik.

Aıta ketsek, byltyr jyl sońynda «ArselorMıttal Temirtaý» kompanııasyna qorshaǵan ortany lastaǵany úshin 5,8 mlrd teńge aıyppul salynǵan edi.