Ekologııa mınıstrligi aldaǵy on jylda qaldyq kólemin 50 paıyzǵa azaıtpaq

NUR-SULTAN. QazAqparat – Elimizdiń jańa ekologııalyq kodeksine sáıkes aldaǵy ýaqytta óńir ákimdikteri qorshaǵan ortany jaqsartýǵa qatysty kórsetkishterdi aldyn ala bekitedi. Bul týraly QR Ekologııa, geologııa jáne tabıǵı resýrstar mınıstrligi Ekologııalyq retteý jáne baqylaý komıtetiniń tóraǵasy Zulfuhar Joldasov málim etti, dep habarlaıdy QazAqparat tilshisi.

«Elimizdegi ekologııalyq jaǵdaıdy jaqsarta túsýdiń bir amaly ónerkásipte úzdik qoljetimdi tehnologııalardy engizý. Jańa ekologııalyq kodekske sáıkes, 2025 jyldan bastap úzdik qoljetimdi tehnologııa júıesine kóshý josparlanyp otyr. Sonyń arqasynda aldaǵy 10 jyldyń ishinde shyǵarylatyn qaldyqtar kólemi 50 paıyzǵa deıin azaıady degen boljamǵa kelip otyrmyz», - dedi Z. Joldasov OKQ-de ótken baspasóz máslıhatynda.

Sondaı-aq, komıtet basshysy atalǵan kodeks aıasynda qorshaǵan ortany qorǵaýda jergilikti atqarýshy organdardyń da mindetteletinin aıtyp ótti.

«Kodeks kúshine engennen keıin, ákimdikter ár 5 jyl saıyn qorshaǵan orta sapasynyń maqsatty kórsetkishi men ony jaqsartý jónindegi is-sharalardy bekitetin bolady. Odan bólek, ákimdikterge aýa sapasy nasharlaǵan jaǵdaıda qala aýmaǵyna kólikterdiń kirýine shekteý qoıýǵa jáne aýany lastaýshy kásiporyndardyń qyzmetine ýaqytsha shekteý engizý quzyreti beriledi»,- deıdi ol.

Buǵan deıin mınıstrlik ókili otandyq kásiporyndardyń qaldyq kózderine qatysty monıtorıng júıesin ornatýǵa mindetteletini týraly aıtty.

Onyń aıtýynsha, 2023 jylǵa deıin barlyq iri kásiporyndar atalǵan júıeni ornatyp, ol týraly komıtetke derekter berip otyrýy tıis.